अमरावती : अचलपूर तालुक्यातील पथ्रोट येथे ५६ वर्षीय अल्पसंख्याक असहाय महिलेवर बलात्कार करून ३२ वर्षीय युवकाने तिचा खून केला. खुनानंतर त्या महिलेचा मृतदेह स्वतःच्या घरातच रजईत गुंडाळून ठेवल्याची घटना शुक्रवारी पथ्रोट येथे घडली. सायंकाळी ४ च्या सुमारास घडलेली ही घटना रात्री साडेआठ वाजता उजेडात आली.
मृत महिलेच्या नातेवाईकांच्या तक्रारीवरून पथ्रोट पोलिसांनी आरोपी विशाल जगन्नाथ नांदूरकर(३२, रा. तांबटकरपुरा, पथ्रोट) याच्याविरुद्ध खून, अत्याचारप्रकरणी गुन्हा नोंदवून त्याला अटक केली आहे. तत्पूर्वी, घटनेची माहिती मिळताच शुक्रवारी रात्री जिल्हा पोलिस अधीक्षक अविनाश बारगळ व अप्पर पोलिस अधीक्षक शशिकांत सातव यांनी घटनास्थळाला भेट दिली. मृत महिलेचे शनिवारी अचलपूर उपजिल्हा रुग्णालयात शवविच्छेदन करण्यात आले. शवविच्छेदन अहवालानंतर मृत्यूच्या कारणांचा अधिक खुलासा पोलिसांकडून अपेक्षित आहे. यादरम्यान कायदा व सुव्यवस्थेच्या अनुषंगाने गावातील पोलिस बंदोबस्तात वाढ करण्यात आली आहे.
आरोपीकडूनच फुटले बिंग
पीडित महिलेच्या मृत्यूनंतर तिचा मृतदेह आरोपीने स्वतःच्याच घरात रजईत गुंडाळून लपवून ठेवला होता. यानंतर तो दारूच्या नशेत सायंकाळी पोलिस ठाण्याकडे फिरत असताना अनावश्यक बडबड करीत होता. या बडबडीत माझ्या घरात ती महिला पाय घसरून पडली अन् मेली, असेही तो बोलून गेला. परिसरात असलेल्या एका पोलिस कर्मचाऱ्याने त्याला थांबवून ठेवत त्याच्या बडबडीची दखल घेतली आणि आरोपीच्या घरी जाऊन शोध घेतला. प्रथमत: त्याला महिला दिसली नाही. तथापि, घरातील गादी आणि रजई खाली पडलेली दिसली. पोलिस कर्मचाऱ्याने ती रजई, गादी सरकवून बघताच महिलेचा मृतदेह दिसून आला आणि लागलीच पोलिसांची धावपळ सुरू झाली. पोलिस बंदोबस्तात वाढ केली गेली.
कापडाने गळा घोटला
आरोपी विशाल हा मद्याच्या अमलात राहतो, तर मृत महिला एका पायाने अधू होती. कुबड्यांच्या साहाय्याने घरोघरी जाऊन किरकोळ कामे करून ती उदरनिर्वाह करायची. आरोपीने तिला घरी बोलावून कार्यभाग उरकविला आणि त्यानंतर कापडाने गळा घोटला. यातच ती ठार झाली, अशी सूत्रांची माहिती आहे.
तीन दिवसांची पोलिस कोठडी
आरोपीस पथ्रोट पोलिसांनी शनिवारी अचलपूर न्यायालयापुढे हजर केले. न्यायालयाने आरोपीस २९ नोव्हेंबरपर्यंत तीन दिवसांची पोलिस कोठडी दिली आहे.
आरोपीविरुद्ध गुन्हा दाखल करून अटक केली. आम्हांला शवविच्छेदन अहवालासह वैद्यकीय अहवालाची प्रतीक्षा आहे.
- सचिन जाधव, ठाणेदार, पथ्रोट.