परतवाडा : वाढत्या कोरोना रुग्णांमुळे अचलपूर तालुक्यातील परिस्थिती स्फोटक बनली असून, अचलपूर पंचायत समितीच्या प्रशासकीय इमारतीचे मुख्य प्रवेशद्वार कुलूपबंद करण्यात आले आहे.
अभ्यागतांना निवेदनासह अधिकाºयांना भेटण्यास मनाई करण्यात आली आहे. त्यांचे निवेदन इमारतीच्या मागील बाजूस असलेल्या एका खिडकीतून स्वीकारले जाणार असल्याच्या सूचना त्याठिकाणी लावण्यात आल्या आहेत.
पंचायत समितीचे सहायक गटविकास अधिकारी व अतिरिक्त बाल विकास अधिकारी कोरोना संक्रमित निघाले आहेत. सोबतच गटशिक्षणाधिका०यांच्या कक्षाची दारेही बंद होती. पंचायत समिती कार्यालयात सर्वत्र शुकशुकाट पसरलेला होता. मेळघाट (प्रादेशिक) वनविभाग परतवाडा येथील विभागीय कार्यालयातीलही दोन कर्मचारी कोरोना संक्रमित निघाले आहेत.
ग्रामीण भागातही कोरोना जोरात
अचलपूर-परतवाडासह लगतच्या परिसरात १५ फेब्रुवारीला एकाच दिवशी ४० रुग्ण कोरोना संक्रमित निघाले आहेत. यात गोंडविहीर, इसेगाव, गौरखेडा कुंभी, बोरगाव तळणी, वडूरा, जवर्डी, येवता, देवमाळी, कांडली, वासनी खुर्द येथील कोरोना रुग्णांचा समावेश आहे. तालुक्यातील अर्ध्याहून अधिक गावांमध्ये कोरोना रुग्ण निघाले असून, आजही ते निघत आहेत. यात नव्या गावातील कोरोना रुग्णांचाही अधिकच भर पडत आहे. देवमाळी, कांडली तर ‘हॉट स्पॉट’ बनले आहेत.
जुळ्या शहरांतील हे भाग बनले ‘हॉट स्पॉट’
अचलपूर शहरातील चावलमंडी, बिलनपुरा, मिल कॉलनी, अभिनव कॉलनी, देवळी, गांधी पूल, बुंदेलपुरा तसेच परतवाडा शहरातील सदर बाजार, टिळक चौक, पेन्शनपुरा, सिव्हिल लाईन, ब्राम्हणसभा, पिंपरकर मार्ग परिसरातील परिस्थिती स्फोटक बनली आहे. शहरात ताप, खोकला, सर्दीचे रुग्ण वाढले आहेत. वाढत्या रुग्णांचा परिणाम बाजारपेठेवरही जाणवायला लागला आहे. दोन दिवसांपासून बाजारपेठेतील वर्दळ मंदावली आहे. कोरोना रुग्णांमुळे चिंता वाढली आहे.
पर्यायी व्यवस्था
कोरोना रुग्णांची वाढती संख्या बघता ट्रामा केअर युनिटमध्ये नव्याने पंधरा बेड लावण्यात आले आहे. कोविड रुग्णालय अचलपूर मधील ३५ आणि ट्रामामधील १५ अशा ५० बेडची व्यवस्था कार्यान्वित आहेत. हे सर्व बेड फुल्ल आहेत. याव्यतिरिक्त आंबेडकर वसतिगृहात व बुरडघाट येथील आश्रमशाळेत कोविड सेंटर उघडण्याचा निर्णय स्थानिक प्रशासनाने घेतला आहे.
—————————