लोकमत न्यूज नेटवर्कअमरावती : कोरोना संसर्गाने रुग्णांच्या मृत्युसंख्येत वाढ होत आहे. त्यामुळे येथील हिंदू स्मशानभूमीत कोरोना मृतदेहांवर अंत्यसंस्कारासाठी विलंब होत आहे, शिवाय मृतदेहांवर अंत्यसंस्कारासाठी जागा उपलब्ध नाही. परिणामी हिंदू स्मशान संस्थेच्या पदाधिकारी, महापालिका आयुक्त प्रशांत रोडे, उपायुक्त रवि पवार यांनी रविवारी विलासनगर स्मशानभूमीची पाहणी केली. येथे चार कोरोनाग्रस्तांवर अंत्यसंस्कार पार पडले. ‘लोकमत’ने १७ एप्रिल रोजी ‘स्मशानभूमीत जागा मिळेना, खुल्या जागेवर अंत्यविधी’ या आशयाचे सचित्र वृत्त प्रकाशित करून कोरोना मृतदेहांचे अंत्यसंस्काराप्रसंगी वास्तव लोकदरबारात मांडले. या वृत्ताची दखल घेत जिल्हाधिकारी शैलेश नवाल, महापालिका आयुक्त प्रशांत रोडे यांनी पर्यायी स्मशानभूमीचा शोध चालविला आहे. हिंदू स्मशान संस्थेचे अध्यक्ष आर. बी. अटल यांच्यावर ही जबाबदारी सोपविली आहे. विलासनगरनंतर फ्रेजरपुरा, शंकरनगर येथील स्मशानभूमीची पाहणी झाली. येथे असलेल्या अंत्यविधीसाठीच्या प्राथमिक सुविधा, शेड, सुरक्षितता आदी बाबींवर भर देण्यात आला आहे. येत्या आठवड्यात कोरोना मृतदेहांवर फ्रेजरपुरा, शंकरनगर या स्मशानभूमीत अंत्यविधी करण्यात येणार आहे. त्यामुळे हिंदू स्मशानभूमी येथील अंत्यविधीसाठीचा ताण कमी होण्याचे संकेत आहेत.
रविवारपासून विलासनगर स्मशानभूमीत अंत्यसंस्कार सुरू झाले आहेत. एक ते दोन दिवसांत शंकरनगर, फ्रेजरपुरा स्मशानभूमीत नियोजन केले जाईल. -शैलेश नवाल, जिल्हाधिकारी, अमरावती.
जिल्हाधिकारी, महापालिका आयुक्त यांच्या सूचनेनुसार रविवारी विलासनगर, फ्रेजरपुरा, शंकरनगर स्मशानभूमींची पाहणी केली. येथे असलेल्या सुविधांचा आढावा घेण्यात आला. -आर. बी. अटल, अध्यक्ष, हिंदू स्मशान संस्था