डफरीनमध्ये गलिच्छ वातावरण : रूग्णांसह नातेवाईकही हैराण वैभव बाबरेकर - अमरावती या ना त्या निमित्ताने सदैव चर्चेत राहणार्‍या जिल्हा स्त्री रुग्णालय परिसरातील अस्वच्छतेचा मुद्दासुध्दा सदैव चर्चेत असतो. या घाणीमुळे व दुर्गंधीमुळे बाळ-बाळंतिणींच्या आरोग्याला धोका निर्माण झाला आहे. डफरीनमध्ये जन्माला येणार्‍या बालकांना जन्मल्याबरोबर घाण आणि दुर्गंधीचा सामना करावा लागतो. गलिच्छ वातावरणातच महिला प्रसूत होतात. त्यामुळे गरोदर महिला आणि जन्माला येणार्‍या बालकांना रोगराईची लागण होण्याची शक्यता नाकारता येत नाही. डफरीन रूग्णालयातील घाण, केरकचरा आणि दुर्गंधीमुळे रूग्णांसह नातेवाईकही हैराण झाले आहेत. याबाबत कित्येकदा तक्रारी करण्यात आल्या. परंतु याकडे डफरीन प्रशासन दुर्लक्ष करीत आहे. प्रवेशद्वारापासून दुर्गंंधी अनेक दिवसांपासून रूग्णालय परिसरात असे घाणेरडे वातावरण आहे. परंतु आजपर्यंत रुग्णालय प्रशासनाने कोणतीच दखल घेतली नाही. लोकप्रतिनिधीसुध्दा या प्रश्नाबाबत गंभीर असल्याचे दिसत नाही. जिल्ह्याच्या ग्रामीण भागातून येणार्‍या रूग्णांना व शहरातील गोरगरीब रूग्णांना नि:शुल्क आरोग्य सेवा पुरविण्याकरिता शासनाने प्रत्येक शहरात सामान्य रुग्णालयांची व्यवस्था केली; मात्र शहरातील शासकीय रुग्णालयांची अवस्था दिवसेंदिवस बिकट होत चालली आहे. शासकीय रुग्णालयातील भोंगळ कारभार अनेकदा चव्हाट्यावर आला आहे. अनेकदा नागरिकांनी शासकीय रुग्णालयाच्या कारभाराविरुध्द आक्षेपही घेतले आहेत. तरीही प्रशासनाकडून अद्याप कोणतीही दखल घेतली गेली नाही. रुग्णालयाची स्थिती सुधारण्याकरिता राजकीय पक्षांनी अनेक आंदोलनेसुध्दा केली. तरी देखील काहीच उपयोग झाला नाही. रूग्णालयाच्या आवारात प्रवेश करताच तीव्र उग्र दुर्गंंदी नाकात शिरते. त्यावरून या रूग्णालयातील स्थितीची कल्पना येते. रूग्णालय परिसरातील नाल्या घाणीने तुंडूंब भरल्या आहेत. आवारात कुत्रे व डुक्करांचा नेहमीच वावर असतो. सर्वत्र गलिच्छ वातावरण दिसून येते. यामुळे प्रसूत महिला रूग्णांच्या आरोग्याला धोका संभवतो. (प्रतिनिधी) जिल्हा स्त्री रूग्णालयाच्या आवारात अशी घाण साचली आहे. कुजलेल्या या घाणीमुळे दुर्गंंधी पसरली आहे.
बाळ-बाळंतिणींचे आरोग्य धोक्यात
By admin | Updated: May 19, 2014 23:07 IST