चांदूर रेल्वे नगर परिशद

जिल्हाधिकारी यांच्या आदेशान्वये स्थायी समितीच्या व विषय समितीच्या निवडणुकीसाठी विशेष सभा शुक्रवारी दुपारी १२ वाजता स्थानिक नगर परिषद सभागृहात पार पडली. यावेळी पीठासीन अधिकारी तथा उपविभागीय अधिकारी इब्राहिम चौधरी यांच्या अध्यक्षतेखाली सदर सभा सुरू करण्यात आली होती. या सभेला निवडून आलेले १६ व नामनिर्देशित २ न. प. सदस्य उपस्थित होते. या विशेष सभेमध्ये सार्वजनिक बांधकाम समितीच्या सभापतिपदी शुभांगी वानरे यांची निवड करण्यात आले. यांना सूचक प्रवण भेंडे व अनुमोदक स्वाती माकोडे ह्या होत्या. तर पाणीपुरवठा व जलनिस्सारण समितीच्या सभापतीपदी गोटु उर्फ वैभव गायकवाड यांची वर्णी लागली. यांना सूचक स्वाती माकोडे व अनुमोदक सतपाल वरठे होते. याशिवाय महिला व बालकल्याण समितीच्या सभापतीपदावर कल्पना लांजेवार यांची निवड करण्यात आली. यांना सूचक शबाना परवीन अ. हमीद कुरेशी व अनुमोदक शारदा मेश्राम ह्या होत्या. तसेच या समितीच्या उपसभापतिपदी शारदा मेश्राम यांची वर्णी लागली. तर स्वच्छता वैद्यक सार्वजनिक आरोग्य व शिक्षण समितीच्या सभापती पदावर महेश कलावटे यांची निवड करण्यात आली. यांना सूचक सतपाल वरठे व अनुमोदक प्रवण भेंडे होते. तर स्थायी समिती मध्ये एकूण ६ सदस्य असून त्यात अध्यक्ष शिट्टू सुर्यवंशी हे स्थायी समितीचे पदसिद्ध सभापती असुन आणि उपाध्यक्ष देवानंद खुणे हे नियोजन व विकास समितीचे पदसिद्ध सभापती आहेत. यामध्ये सहाय्यक निवडणूक निर्णय अधिकारी म्हणून डॉ. मेघना वासनकर यांनी काम पाहिले. या सभेला नगराध्यक्ष शिट्टू सूर्यवंशी, उपाध्यक्ष देवानंद खुणे व सर्व नगर परिषदेचे सदस्य व कर्मचारी उपस्थित होते.