शेंदूरजनाघाट : पुसलानजीक तिजारे तलावात सापडलेल्या अज्ञात मृतदेहाची ओळख पटली आहे. मृत युवक हा अमरावती येथील रहिवासी असून त्याचा अज्ञात कारणांसाठी गळा आवळून हत्या करण्यात आली असल्याचा प्राथमिक निष्कर्ष पोलिसांनी काढला आहे.
पोलस सूत्रांनुसार, २ सप्टेंबर रोजी सकाळी ११ च्या सुमारास तलावात मृतदेह सापडल्याची माहिती पोलीस पाटील सारिका डोंगरे यांच्याकडून शेंदूरजनाघाट पोलिसांना देण्यात आली. पोलिसांनी पंचनामा करून त्याचा मृतदेह शवविच्छेदनासाठी पाठविला. शवविच्छेदन अहवालानुसार, त्याचा अज्ञात ठिकाणी गळा आढळल्यानंतर या तलावात आणून टाकण्यात आले. फईमोद्दीन नसरुद्दीन काजी (२१, रा. अबू बकर कॉलनी, वलगाव रोड, अमरावती) अशी त्याची ओळख पटली आहे. व्यापारानिमित्त त्याला गाठून हे कृत्य करण्यात आल्याचा अंदाज पोलिसांनी व्यक्त केला. शवविच्छेदन अहवालानंतर दाखल केलेला मर्ग हटवून कलम ३०२, २०१ अन्वये अज्ञात व्यक्तीविरुद्ध गुन्ह्याची नोंद शेंदूरजनाघाट पोलिसांनी केली. याबाबत कुटुंबीयांचे बयाण पोलिसांनी नोंदविले आहेत.