तिवसा : शहराच्या पंचवटी चौकात जिलेटिन व स्फोटक आढळल्याने जिल्ह्यात एकच खळबळ उडाली होती. मात्र, ती स्फोटके विहिरी खोदतेवेळी करण्यात येणाऱ्या ब्लास्टिंगसाठी वापरण्यात येणार होते, या निष्कर्षाप्रत तिवसा पोलीस पोहोचले आहेत. पोलिसांनी घातपात वा अन्य हिंसक घटनेची शक्यता फेटाळली आहे. यादरम्यान आरोपी अंकुश लांडगे व कमलेश दापूरकर (दोन्ही रा. करजगाव) यांना पोलिसांनी शुक्रवारी रात्री उशिरा गावातून अटक केली.
तत्पूर्वी, गुरुवारी रात्री सातरगाव येथील सुमीत सोनोने या युवकाला अटक करण्यात आली होती. त्याला न्यायालायाने एका दिवसाची पोलीस कोठडी सुनावली होती. ती स्फोटके ही केवळ विहीर ब्लास्टिंग कामांसाठी वापरण्यात येणार असल्याची माहिती त्याने पोलिसांनी दिली. विहिरीच्या खोदकामाकरिता वापरण्यात येत असलेल्या जिलेटिन स्फोटकांची खरेदी व व्यवहार सोनोने याने केला होता. तिवसा येथून ती स्फोटके घेऊन जात असतानाच गुरुवारी रात्रीच्या वेळी पंचवटी चौकात ड्युटीवर असलेल्या वाहतूक पोलिसांना पाहून ते पळाले. पडताळणीअंती यामध्ये अंकुश मोहन लांडगे व कमलेश नंदकिशोर दापूरकर हे सोनोने याच्याकडून ती स्फोटके खरेदी करून घेऊन जात होते. त्यामुळे या दोघांनाही तिवसा पोलिसांनी गावातून अटक केली. पुढील तपास तिवसा पोलीस करीत आहेत.