अमरावती : तो तिच्या प्रेमात आकंठ बुडाला, त्याने तिला सर्वस्व मानले, तिनेदेखील त्याला लग्नास होकार दिला. मात्र, अलीकडे ती बदलली. त्याला टाळू लागली. त्याने तिला जाब विचारला असता, चक्क तिने लग्नास नकार दिला. त्यामुळे तो डिप्रेशनमध्ये गेला व थेट फासावर झुलला. मात्र, आत्महत्येपूर्वी ‘तिने माझ्यासोबत खेळ खेळला,’ अशी सुसाईड नोट लिहून ठेवली. प्रेमाच्या अकाली मृत्यूची ही धक्कादायक घटना बुधवारी येथे घडली.
राहुल संजय चौरागडे (२२, रा. जनता कॉलनी) असे मृत तरुणाचे नाव आहे. पोलिसांनी घटनास्थळावरून सुसाईड नोट ताब्यात घेतली असली तरी तुर्तास आकस्मिक मृत्यूची नोंद घेतली आहे. ३१ मे रोजी दुपारी १२:३०च्या सुमारास राहुलने राहत्या घरी छताच्या कडीला गळफास घेतला. त्याच्या वहिनीने वर जाऊन पाहिले असता तो गळफास घेतलेल्या स्थितीत दिसून आला. त्या खोलीमधील टीपॉयवर त्याने मृत्यूपूर्वी लिहिलेली चिठी आढळून आली. आपल्या मृत्यूला एक मुलगी कारणीभूत आहे. तिने आपल्याला लग्नासाठी होकार दिला होता. मात्र, ती आपल्याशी खेळ खेळली. त्यामुळे आपण आत्महत्या करीत असल्याचे त्या चिठीत नमूद आहे. याप्रकरणी त्याच्या वडिलांच्या तक्रारीवरून राजापेठ पोलिसांनी आकस्मिक मृत्युचा गुन्हा नोंदविला. पोलिसांनी पुढील तपास चालविला आहे. संबंधित मुलीचे बयान घेतले जाण्याची शक्यता आहे.
तीन वर्षांपासून सुरू होते लव्ह अफेअर
राजापेठ पोलिसांनुसार, राहुलचे संबंधित मुलीशी तीन वर्षांपासून प्रेमसंबंध होते. तो तिच्यावर अत्याधिक प्रेम करत होता. मात्र, अलीकडे ती अन्य व्यक्तीसोबत रमत असल्याचे त्याच्या लक्षात आले. तिने लग्नासही टोलवाटोलवी केली. मात्र, तो तिच्या प्रेमात आकंठ बुडाला होता. त्यामुळे त्याला ‘नर्व्हसनेस’ आले. त्यातून त्याने आत्मघाताचे टोकाचे पाऊल उचलले, असा सुसाईड नोटवरून प्राथमिक निष्कर्ष काढता येऊ शकतो, असे राजापेठ पोलिसांनी सांगितले.