अमरावती: जिल्हा सामान्य रुग्णालय (इर्विन) येथे मंगळवारी हृदयाचा त्रास होत असलेल्या ९४ बालकांचे टू-डी इको करण्यात आले. यामध्ये ३० बालकांमध्ये हृदयाला छिद्र म्हणजेच हृदयविकाराचा त्रास असल्याचे निदान करण्यात आले असून, लवकरच या बालकांचे प्राण वाचविण्यासाठी आरबीएसकेअंतर्गत मोफत हृदयविकार शस्त्रक्रिया देखील करण्यात येणार असल्याची माहिती रुग्णालय प्रशासनाने दिली. नवीन वर्षात पहिल्यांदाच इतक्या मोठ्या प्रमाणात बालकांची तपासणी करण्यात आली.
बदलत्या जीवनशैलीमुळे हृदयविकाराचे प्रमाण मोठ्या प्रमाणावर वाढले आहे. त्यामुळे याचे वेळीच योग्य निदान झाल्यास त्यावर उपचार करणे शक्य आहे. लहान मुलांनाही जन्मत:च हृदयविकार होतात. यामध्ये त्यांच्या हृदयाला छिद्र असणे, श्वास घेण्यास त्रास होणे, धाप लागणे यांसारखी लक्षणे असतात. त्यामुळे अशा बालकांवर राष्ट्रीय बाल स्वास्थ्य कार्यक्रमांतर्गत ० ते १८ वर्ष वयोगटातील मुलांचे वेळीच निदान करून मोफत उपचार केले जातात. त्यामुळे हृदयविकार आजाराचे निदान करण्यासाठी ‘टू डी इको’ हे आवश्यक आहे. त्यामुळे जिल्हा सामान्य रुग्णालय येथे कार्यान्वित करण्यात आलेल्या टू-डी इको मशीनवर मंगळवारी हृदयाचा त्रास जाणवत असलेल्या ९४ बालकांची तपासणी करण्यात आली. या तपासणीमध्ये ३० बालकांमध्ये हृदयविकार असल्याचे निदान करण्यात आले आहे. त्यामुळे या बालकांचे प्राण वाचविण्यासाठी त्यांच्यावर लवकरच मोफत हृदयविकार शस्त्रक्रिया करण्यात येणार आहे. यावेळी रुग्णांची तपासणी आचार्य विनोबा भावे रुग्णालय येथील बाल हृदयरोग तज्ज्ञ डॉ. शंतनू गोमासे यांनी केली. यावेळी समन्वयक प्रतीक गडकरी यांनी त्यांना मदत केली. ही तपासणी मोहीम यशस्वी करण्यासाठी आरबीएसके जिल्हा कार्यक्रम पर्यवेक्षक नीलेश पुनसे, सांख्यिकी अन्वेक्षक प्रसाद अनासने, डीईआयसी व्यवस्थापक डॉ. प्रीती रोडे व जिल्ह्यातील संपूर्ण वैद्यकीय अधिकारी व कर्मचारी यांनी परिश्रम घेतले.