अंजनगाव सुर्जी : ‘१०८’ रुग्णवाहिकेच्या कंट्रोलरकडून रुग्णांना तालुक्यांतील खासगी रुग्णालयांतून उपचारासाठी नेण्यास ‘१०८’ रुग्णवाहिकेच्या कंट्रोलरकडून नकार मिळत आहे. विशेष म्हणजे, २७ मे रोजी हा वाद निर्माण झाल्यानंतर अखेर एका रुग्णाला खासगी वाहनाने परतवाडा येथे हलवण्यात आले आहे. अशा स्थितीत या रुग्णवाहिकांचा उपयोग काय, अशी ओरड होत आहे. सूत्रांनुसार, आठ दिवसांपूर्वी दयानंदनगर येथील हातमजुरी करणारे शिवदास पायघन हे कोरोना पॉझिटिव्ह निघाल्याने त्यांना भंडारज येथील खासगी कोविड हाॕस्पीटलला उपचारासाठी दाखल करण्यात आले होते. तेथून आठ दिवसानंतर सुटी मिळाली. परंतु, घरी येताच दुसऱ्याच दिवशीच त्यांची प्रकृती अचानक बिघडली. त्यामुळे त्यांचे कुटुंबीयांनी त्यांना शहरातीलच एका खासगी रुग्णालयात नेले. डॉक्टरांनी त्यांना परतवाडा किंवा अमरावतीला कोविड रुग्णालयात नेण्यास सुचवले. सामाजिक कार्यकर्ते मनोहर मुरकुटे यांनी शहरांतील काही खासगी रुग्णवाहिकांसाठी संपर्क साधला. अखेर १०८ या नंबरवर संपर्क केलाा. रुग्णवाहिकेच्या कंट्रोलरकडून आम्ही रुग्णाला फक्त शासकीय कोविड सेंटरवरूनच नेतो, खासगी सेंटरवरून नाही, असे उत्तर मिळाले. रुग्णाची वाईट स्थिती पाहता, अखेर रुग्णाला खाजगी वाहनाने परतवाडा येथे न्यावे लागले. अशा रुग्णवाहिकेचा उपयोग काय, हा प्रश्न याप्रसंगी निर्माण झाला आहे.
------------------
रुग्णवाहिकांनी शासकीय वा खासगी असा भेद न करता रुग्णसेवा द्यावी. याबाबत मी त्वरित चौकशी करतो व अशा रुग्णांसाठी प्रयत्न करतो.
- बळवंत वानखडे आमदार.