अकोला : आगामी जिल्हा परिषद व पंचायत समिती निवडणुकांमध्ये बहुजन समाज पार्टी आपले उमेदवार स्वबळावरच रिंगणात उतरविणार असून, कार्यकर्त्यांनी कामाला लागावे, असे आवाहन बसपाचे महाराष्टÑ प्रभारी अॅड. संदीप ताजणे यांनी केले. स्थानिक विश्रामगृह येथे १९ आॅगस्ट रोजी त्यांनी कार्यकर्त्यांची बैठक घेतली. या बैठकीला जिल्हा प्रभारी डॉ.एस.एस. तायडे, जिल्हा कोषाध्यक्ष श्रीकृष्ण वानखडे, राजकुमार वाघमारे, नानाजी धरडे, वीरेंद्र सिरसाट, प्रा.व्ही.आर. साबळे, नागसेन आदी उपस्थित होते. ताजणे यांनी पदाधिकाऱ्यांना सभासद नोंदणी पूर्ण करण्याचे आवाहन केले. बहन मायावती यांच्यामध्येच आंबेडकरी चळवळ पुढे नेण्याचे सामर्थ्य असून, कार्यकर्त्यांनी पक्ष वाढीसाठी प्रयत्न करावे, असे ते म्हणाले. अकोल्यात जिल्हा परिषद व पंचायत समितीमध्ये सक्षम उमेदवार देणार असून, स्वबळावरच तयारी करायची असल्याचेही त्यांनी सांगितले.