खेट्री : पातूर तालुक्यातील चान्नी पोलीस स्टेशनअंतर्गत येत असलेल्या चांगेफळ फाट्यावर व्यायाम करणाऱ्या युवकाला अज्ञात दुचाकीस्वाराने उडविल्याची घटना बुधवारी (दि. २३) रात्री ८:३० वाजेच्या सुमारास घडली. यामध्ये युवक गंभीर जखमी झाला आहे.
चांगेफळ येथील रहिवासी अमर गजानन सदार (२५) हा युवक नेहमीप्रमाणे पिंपळखुटा-चान्नी मार्गवरील शनिमंदिर येथे व्यायाम करण्यासाठी गेला असता, पिंपळखुटा येथून चान्नीकडे जात असलेल्या दुचाकीस्वाराने अमर सदार यास उडविले. या अपघातात अमर सदार गंभीर जखमी झाला आहे. दुचाकीस्वाराने उडवल्यानंतर दुचाकी सोडून घटनास्थळावरून पसार झाला. घटनेची माहिती मिळताच चांगेफळ येथील ग्रामस्थांनी घटनास्थळी धाव घेऊन गंभीर झालेल्या अमर सदार यास चतारी ग्रामीण रुग्णालयात नेले असता, त्यांची प्रकृती गंभीर असल्याने त्याच्यावर प्रथमोपचार केल्यानंतर पुढील उपचारासाठी सर्वोपचार रुग्णालय, अकोला येथे हलविण्यात आले आहे. घटनेची माहिती मिळताच चान्नी पोलीस स्टेशनचे ठाणेदार राहुल वाघ, उपनिरीक्षक गणेश नावकार, सुधाकर करवते आदींनी तत्काळ घटनास्थळ गाठले आणि घटनेचा पंचनामा करून अज्ञात दुचाकी जप्त केली आहे.