ठळक मुद्देघटना पारस रेल्वेस्थानकावर शनिवारी दुपारी घडली.या घटनेत सदर महिलेच्या दोन मुली मात्र बचावल्या
पारस : रेल्वे रुळ पार करण्याच्या प्रयत्नात असलेली एक महिला व तिच्या सात वर्षीय बालकाचा रेल्वे खाली चिरडल्याने मृत्यू झाल्याची घटना बाळापूर तालुक्यातील पारस रेल्वेस्थानकावर शनिवारी दुपारी घडली. श्रद्धा सिरसाट असे मृतक महिलेचे नाव असून, ती अकोला येथील रमाबाई आंबेडकर नगर भागातील असल्याची माहिती आहे. या घटनेत सदर महिलेच्या दोन मुली मात्र बचावल्या आहेत. श्रद्धा सिरसाट या आपल्या दोन मुली व एक मुलासह बाळापूर तालुक्यातील जोगलखेड येथील नातेवाईकाकडे गेल्या होत्या. तिकडून परत येत असताना रेल्वेमार्ग ओलांडून त्या पारस स्थानकावर आल्या. यावेळी त्यांनी आपल्या दोन मुलींना रेल्वे मार्ग ओलांडण्यास मदत केली. त्यानंतर मुलाला घेऊन रेल्वे मार्ग पार करत असताना धडधडत आलेल्या रेल्वेगाडीने दोघा मायलेकांना चिरडले.