वणी रंभापूर गावाच्या सीमा बंद!

अकोला तालुक्यातील ग्राम वणी रंभापूर येथे दिवसेंदिवस कोरोनाचा प्रादुर्भाव वाढत आहे. त्यामुळे गावात आरोग्यविषयक आपत्कालीन परिस्थिती निर्माण झाली आहे. कोरोनाच्या संसर्गावर नियंत्रण मिळविण्यासाठी आपत्कालीन उपाययोजना करण्याची आवश्यकता निर्माण झाल्याने दि. १ जूनपर्यंत सकाळी ७ वाोतापर्यंत कडक निर्बंध लागू करण्यात आले आहेत. जिल्हा आरोग्य अधिकाऱ्यांनी नमूद केल्यानुसार ग्रामीण भागात १० पेक्षा जास्त कोविड रुग्ण असणाऱ्या गावांमध्ये कोविड-१९चा प्रसार होऊ नये, याकरिता कडक निर्बंध लावण्याबाबत नमूद केल्यानुसार अकोला तालुक्यातील ग्राम वणी रंभापूर प्रतिबंधात्मक गाव म्हणून शनिवारी जिल्हाधिकाऱ्यांनी घोषित केले असून, गावाच्या सीमा बंद राहणार आहेत. यादरम्यान गावात कडक निर्बंधासोबत सर्व व्यवहार बंद राहणार आहेत. यासाठी उपविभागीय अधिकारी हे आवश्यक कार्यवाही करतील, अशाप्रकारचा आदेश काढला आहे. वणी रंभापूर येथे आरोग्य विभागाचे उपकेंद्र असून, ग्रामपंचायतीसह आरोग्य उपकेंद्र अंतर्गत कोविड-१९बाबत जनजागृती करण्याची घरोघरी तपासणीसह ‘घर तेथे लसीकरण’ करण्याची मागणी ग्रामस्थांकडून होत आहे.