अकाेला : जळगाव खान्देश येथून तेलाने भरलेला ट्रक रायपूरला जात असताना २२ लाख रुपये किमतीचे तेल ट्रकचालकाने इंदूरला परस्पर विकले आणि त्याला दरोडेखोरांनी लुटल्याचा बनाव करीत या प्रकरणाची तक्रार पाेलिस ठाण्यात केली़; मात्र या प्रकरणाचा तपास करताना स्थानिक गुन्हे शाखेने काही दिवसातच ट्रकचालकाने रचलेला कट उघडकीस आणला असून त्याने हे तेल इंदूर येथे विकल्याचेही समाेर आले आहे़. आराेपी ट्रकचालकास पाेलिसांनी अटक केली आहे़.
भुसावळ येथील रोशन होलाराम सचदेव (वय ३५, रा. भुसावळ) हा ट्रकचालक ४ सप्टेंबर रोजी एस. के. ऑईल मिल जळगाव येथून २२ लाख रुपये किमतीचे सूर्यफूल तेल रायपूर येथे घेऊन जात होता. मात्र, चालक रोशन याची नियत बदलल्याने त्याने तेलाचा ट्रक परस्पर इंदूर येथे नेला. तेथे तेलाची विक्री केली व ट्रक मालेगाव येथे औरंगाबाद रोडवर उभा करून थेट बोरगाव मंजू पोलिस ठाणे गाठले व लुटल्याचा बनाव केला. त्यानेच स्वत: पोलिस ठाण्यात रिपोर्ट दिला की, तो हायवेवर नैसर्गिक विधीकरिता थांबला होता. यावेळी एका वाहनातून आलेल्या पाच जणांनी त्याला पकडले. त्यापैकी दोघांनी तीन दिवस डांबून ठेवले. तर दोघे ट्रक घेऊन पळाले. अशा तक्रारीवरून पोलिसांनी तपास सुरू केला. स्थानिक गुन्हे शाखेचे पोलिस व बोरगाव मंजूचे पोलिस संयुक्त तपास करीत असताना त्यांना घटना संशयास्पद वाटली. त्यांनी चालकाची सखोल चौकशी केली असता चालकाने ट्रकमालकासोबत फसवणूक केल्याचा प्रकार उघडकीस आला. त्यानंतर एसके ऑईल मिलचे प्रदीप बन्सीलाल लाहोटी यांच्या तक्रारीवरून पोलिसांनी ट्रकचालकाविरुद्ध गुन्हा दाखल केला़ या गुन्ह्याचा तपास पोलिस अधीक्षक जी. श्रीधर यांच्या मार्गदर्शनामध्ये स्थानिक गुन्हे शाखेचे पोलिस निरीक्षक संतोष महल्ले, पोलिस उपनिरीक्षक गोपाल जाधव, गोकुळ चव्हाण, स्वप्निल खेडकर, लीलाधर खंडारे, नफीस शेख व बोरगाव मंजू येथील शरद बुंदे यांनी केला आहे.