पोलीस सूत्रांनी दिलेल्या माहितीनुसार, टँकरमधून पेट्रोल, डिझेलचोरीचा प्रकार गत महिनाभरापासून सुरू होता. याबाबत मूर्तिजापूर उपविभागीय पोलीस अधिकाऱ्यांना माहिती मिळताच त्यांनी सापडा रचला. गायगाव डेपोतून भारत पेट्रोलियम कंपनीचा टँकर क्रमांक (एमएच २७-एक्स-९९९०) हा १२ हजार लिटर डिझेल, पेट्रोल घेऊन यवतमाळ जिल्ह्यातील नेर येथे जात होता. टँकर गायगाव येथून कापशी-बार्शीटाकळीमार्गे जात असताना शिंदखेडरोडवरील रेल्वे गेटच्याजवळ टँकरचालक आणखी दोन व्यक्ती असे तिघं मिळून टँकरमधून प्लॅस्टिक पाइपच्या साहाय्याने पेट्रोल, डिझेलची चोरी करीत असताना आढळून आले. याकारवाईत तिघांना अटक केली आहे. त्यांच्याकडून १६० लिटर पेट्रोल, डिझेलचा साठा, पेट्रोल-डिझेल चोरी करण्यासाठी वापरण्यात येत असलेले साहित्य, पेट्रोल-डिझेलने भरलेला टँकर असा एकूण २८ लाखांचा मुद्देमाल जप्त करण्यात आला आहे. याप्रकरणी बार्शीटाकळी पोलीस स्टेशनमधे जीवनावश्यक वस्तू कायदा ई.सी. ऍक्ट आणि कलम ३७९नुसार गुन्हा दाखल केला आहे. ही कारवाई उपविभागीय अधिकारी मूर्तिजापूर संतोष राऊत यांच्या मार्गदर्शनाखाली पीएसआय विकास राठोड, पोलीस मंगेश सुळे, रवी पोपडे, सुनील पवार, गजानन ठाकरे, संदीप गुंजाळ यांनी केली. (फोटो)
टॅंकरमधून पेट्रोल, डिझेलची चोरी; दोघांना अटक
By लोकमत न्यूज नेटवर्क | Published: March 01, 2021 4:22 AM