पोलिसाकडूनच पोलीस कर्मचा-यास बेदम मारहाण

अकोला मध्यवर्ती बसस्थानकासमोरील घटना.

अकोला: मध्यवर्ती बसस्थानकासमोरील पॉइंटवर कार्यरत असलेल्या वाहतूक शाखेच्या पोलीस कर्मचार्‍यास वाशिम पोलीस दलात कार्यरत असलेल्या कर्मचार्‍याने बेदम मारहाण केल्याची घटना रविवारी घडली. या प्रकरणी वाशिममधील पोलीस व त्याच्या साथीदाराविरुद्ध सिव्हिल लाइन्स पोलीस ठाण्यात गुन्हा दाखल करण्यात आला आहे. शहर वाहतूक शाखेत कार्यरत असलेले संजय बळीराम इंगळे हे रविवारी सकाळी मध्यवर्ती बसस्थानकासमोरील फिक्स पॉइंटवर कार्यरत होते. यावेळी सिग्नल बंद असताना वाशिम पोलीस दलात कार्यरत असलेला पोलीस कर्मचारी शेखर श्रीधर तायडे व त्याचा साथीदार उमेश अंबादास तेलगोटे हे दोघे त्यांची दुचाकी सिग्नलवर न थांबवता सिग्नल तोडून निघाले; मात्र वाहतूक पोलीस संजय इंगळे यांनी त्यांचा पाठलाग करून दोघांना या संदर्भात विचारणा केली असता या दोघांनी त्यांच्याशी वाद घातला. त्यानंतर इंगळे यांना बेदम मारहाण सुरू केली. या मारहाणीत संजय इंगळे जखमी झाले असून, त्यांच्यावर रुग्णालयात उपचार करण्यात आले. त्यांनी दिलेल्या तक्रारीवरून सिव्हिल लाइन्स पोलिसांनी शेखर तायडे व उमेश तेलगोटे या दोघांविरुद्ध कलम ३५३, ३३२, ३४, ११९, १७७ नुसार गुन्हा दाखल करून त्यांना अटक केली. दोन्ही आरोपींना रविवारी दुपारी न्यायालयात हजर केले असता न्यायालयाने त्यांना जामीन मंजूर केला.