ट्रकवर दगडफेक; पोलिसांकडून बळाचा वापर

व्याळा येथे अपघातानंतर ग्रामस्थ संतप्त.

व्याळा (जि. अकोला): येथे झालेल्या अपघातानंतर ग्रामस्थांनी शुक्रवारी रास्ता रोको आंदोलन केले. गतिरोधकाची मागणी मान्य होत नसल्याने संतप्त झालेल्या काही ग्रामस्थांनी अपघातातील ट्रकवर दगडफेक केली. दगडफेकीत ट्रकच्या चालकच्या कक्षाचे काच फुटले. यावेळी पोलिसांनी सौम्य बळाचा वापर केला. शुक्रवारी दुचाकीच्या धडकेत जिल्हा मध्यवर्ती सहकारी बॅँकेचे शाखाधिकारी व रोखपाल ठार झाले. या घटनेच्यानिमित्ताने व्याळा येथील बस थांब्यावरील गतीरोधकाचा मुद्या ऐरणीवर आला आहे. अकोला ते बाळापूरदरम्यान राष्ट्रीय महामार्गावर ठिकठिकाणी खड्डे पडले आहेत. तसेच ठिकठिकाणच्या बस थांब्यांवर गतिरोधकही नाहीत. त्यामुळे अकोला ते बाळापूरदरम्यान अपघात होण्याचे प्रमाण दिवसेंदिवस वाढतच आहे. ५ जुलै रोजी रिधोरा आणि व्याळा येथे अपघाताच्या दोन घटना घडल्या होत्या. व्याळा येथील बस थांब्यावर एमएच-४६-एच-३0१७ या क्रमांकाचा ट्रकने दिलेल्या धडकेत गजानन किसन वाकोडे (वय ३५) हे मृत्युमुखी पडले होते. दुसरा अपघात रिधोरानजीक काचाच्या गोदामाजवळ झाला होता. या अपघातात चालक बाळू तात्या पांडव व क्लिनर विनाज अली अहेमद अली जखमी झाले होते. यापूर्वीही याच रस्त्यावर झालेल्या अपघातात राष्ट्रीयीकृत बॅँकेच्या अधिकार्‍याचा मृत्यू झाला होता. अपघाताची माहिती मिळताच बाळापूरचे ठाणेदार मिर्झा बेग यांनी कर्मचार्‍यांसह घटनास्थळावर धाव घेतली. यावेळी गतिरोधक बसविण्याची मागणी ग्रामस्थांनी लावून धरली. ही मागणी पूर्ण होईपर्यंत मृतदेह हलविण्यात येणार नाही, असा आक्रमक पवित्रा ग्रामस्थांनी घेतला. त्यामुळे अकोला येथून पोलिसांची जादा कुमक बोलाविण्यात आली. गतिरोधकासाठी संबंधित विभागाच्या अधिकार्‍यांशी चर्चा करण्यात येईल, असे आश्‍वासन पोलिसांनी ग्रामस्थांना दिले. सुमारे चार तासानंतर आंदोलन मागे घेण्यात आले.