एका लाखासाठी छळ; आठ जणांवर गुन्हा

विवाहितेला माहेरवरून एक लाख रुपये आणण्यासाठी सासरच्या मंडळींकडून शारीरिक व मानसिक छळ.

अकोला - बैदपुरा परिसरातील रहिवासी एका विवाहितेला माहेरवरून एक लाख रुपये आणण्यासाठी तिचा सासरच्या मंडळींनी शारीरिक व मानसिक छळ केला. या प्रकरणी विवाहितेने दिलेल्या तक्रारीवरून रामदासपेठ पोलिसांनी सासरच्या आठ जणांविरुद्ध छळाचा गुन्हा दाखल केला आहे. बैदपुरा येथील रहिवासी फरहीन खान हिचा विवाह याच परिसरातील तनवीर खान जहूर खान याच्यासोबत २0११ मध्ये झाला होता. त्यानंतर या विवाहितेला माहेरवरून एक लाख रुपये आणण्यासाठी पती तनवीर, सासू-सासरे व ६ नणंद यांनी शारीरिक व मानसिक छळ सुरू केला. रेफ्रीजेरेटर व दुचाकी वाहनासाठी सासरच्यांनी तिला माहेरवरून एक लाख रुपये आणण्यासाठी तगादा लावला होता. मात्र, या विवाहितेने पैसे आणण्यास नकार दिल्यानंतर त्यांनी तिचा छळ सुरू केला. यादरम्यान, विवाहितेने एका मुलीला जन्म दिला. त्यानंतरही छळ सुरूच असल्याने छळ असहय़ झाल्यामुळे महिलेने रामदासपेठ पोलीस ठाण्यात तक्रार दिली. या तक्रारीवरून पोलिसांनी ८ जणांविरुध्द कलम ४९८ अ नुसार गुन्हा दाखल केला आहे.