संतोषकुमार गवई
पातूर : आमची शाळा कधी सुरू होणार आहे, असा प्रश्न सध्या ग्रामीण भागात पाल्य आपल्या पालकांना व पालक हे पाल्यांच्या गुरुजींना विचारताना दिसून येत आहेत. मागील वर्षापासून कोरोनामुळे लॉकडाऊन आणि अनलॉक ही परिस्थिती चालूच आहे. आता पुन्हा शासनाने १५ जूनपर्यंत काही शिथिलता देत लॉकडाऊन कायम केले आहे. मात्र, दरवर्षी १५ जून व २६ जूनपासून शाळेची घंटा वाजत असते; परंतु सलग दुसऱ्या वर्षीही कोरोनाच्या दुसऱ्या लाटेमुळे लॉकडाऊन कायम केल्याने शाळा ऑनलाइनच सुरू होतील. हे जवळपास निश्चित झाले आहे.
शिक्षण ऑनलाइन की, ऑफलाइन हा सध्या चर्चेचा विषय आहे. मात्र, शासनाने लॉकडाऊन कायम केल्याने शाळा ऑनलाइनचा मार्ग मोकळा झाल्याचे सध्यातरी दिसत आहे.
आता तज्ज्ञांनी तिसऱ्या लाटेचा धोका लहान बालकांवर वर्तवल्यामुळे मुले आणि पालकांचे मनोधैर्य टिकवणे हेही महत्त्वाचे आहे. दुसऱ्या लाटेचा आलेख ओसरत असला तरी कोणताही धोका न पत्करता शासनाने शाळा ऑनलाइनच सुरू होतील, असे स्पष्ट संकेत लॉकडाऊन वाढविल्याने दिले आहेत. शाळा सुरू करून शिकणाऱ्या मुलांना केव्हा शाळेत बोलवायचे, हे शिक्षण क्षेत्रात फार मोठे आव्हान येणाऱ्या दिवसांत असणार आहे.
नवीन शैक्षणिक वर्ष सुरू व्हायला बोटावर मोजण्याइतके दिवस बाकी असताना सध्याची परिस्थिती पाहता सलग दुसऱ्या वर्षीही विद्यार्थ्यांना ऑनलाइन शिक्षण घ्यावे लागणार आहे. कारण विद्यार्थ्यांना अजूनही शाळा प्रवेश बंदी कायम आहे. त्यामुळे शाळेत शिक्षण घेणारे विद्यार्थी बिनधास्त असले तरी त्यांच्या भविष्याबाबत पालक अस्वस्थ झाले आहेत. एकीकडे कोरोनाची भीती, तर दुसरीकडे शिक्षणाची अनिश्चितता दिसत आहे.
--------------------
कोरोनामुळे शाळा कधी सुरू होतील, हे अनिश्चित आहे. मुले- मुली घरच्या घरी खोडकरपणा करण्यात, खेळण्यात इतके बेभान झाले आहेत की, ते पालकांचे ऐकत नाहीत. त्यामुळे त्यांच्या भविष्याबद्दल काळजी वाटू लागली आहे.
सारिका सचिन कोकाटे
पालक, पातूर