अकोला : राष्ट्रीय महामार्ग क्रमांक सहावर दुचाकीस्वाराचे नियंत्रण सुटल्याने दुचाकी दुभाजकावर आदळली. घटनेत दुचाकीस्वार किरण पवार याचा घटनास्थळीच मृत्यू झाला, तर त्याच्यासोबत असलेल्या शेख. अब्दुल्ला हा गंभीर जखमी झाला. ही घटना रविवारी दुपारच्या सुमारास राष्ट्रीय महामार्गावरील अशोक लेलँडजवळ घडली.शिवसेना वसाहत स्थित बजरंग चौक येथील रहिवासी किरण रमेश पवार (१९) आणि पोळा चौकातील कल्याणवाडी येथील रहिवासी शेख अब्दुला अब्दुल सत्तार हे दोघे एका हार्डवेअरच्या दुकानात काम करतात. रविवारी दुकान मालकाच्या कुटुंबातील लग्नासाठी ते एम.एच. ३० ए.एल. ६३३५ क्रमांकाच्या दुचाकीने हॉटेल जलसासाठी निघाले होते; परंतु राष्ट्रीय महामार्गावरील अशोक लेलँडजवळ किरणचे दुचाकीवरील नियंत्रण सुटले व दुचाकी दुभाजकावर जाऊन आदळली. घटनेत किरण पवार याचा घटनास्थळीच मृत्यू झाला, तर शेख अब्दुल्ला हा गंभीर जखमी झाला. घटनेची माहिती मिळताच जुने शहर पोलिसांनी घटनास्थळी धाव घेतली. यावेळी गंभीर जखमीला सर्वोपचार रुग्णालयात दाखल करण्यात आले. अपघातामुळे राष्ट्रीय महामार्ग क्रमांक सहावर दुतर्फा वाहतूक विस्कळीत झाली होती. जवळपास ३० मिनिटांच्या प्रयत्नानंतर वाहतूक सुरळीत करण्यात पोलिसांना यश आले.
दुचाकीच्या अपघातात एक ठार; एक गंभीर जखमी
By लोकमत न्यूज नेटवर्क | Updated: December 30, 2019 10:30 IST