अनैतिक संबंधातून इसमाची हत्या

प्रेत जमिनीत पुरले, भेंडगावच्या महिलेस अटक

पिंजर - बार्शीटाकळी तालुक्यातील भेंडगाव येथे एका इसमाचा अनैतिक संबंधातून खून झाल्याचे खळबळजनक प्रकरण गुरुवारी उघडकीस आले. महादेव रामभाऊ निलखन रा. बार्शीटाकळी असे मृतकाचे नाव आहे. पिंजर पोलिसांनी या प्रकरणी मंजुळाबाई देवीदास भगत या महिलेस अटक केली आहे. या प्रकरणाची माहिती अशी की, महादेव निलखन हा भेंडगावातील या महिलेच्या घरी नेहमी यायचा. २१ मे रोजी सकाळी तो येथे आला. दरम्यान मंजुळा व महादेव यांच्यात वाद झाला. यानंतर त्याने आत्महत्या केली, अशी माहिती मंजुळाने पोलिसांना दिली; परंतु मंजुळाबाईने त्याचा गळा आवळून खून केल्याचा अंदाज पोलिस व्यक्त करीत आहेत. मंजुळाबाईच्या घरात मरण पावलेल्या महादेवच्या प्रेताची विल्हेवाट लावण्यासाठी तिने २२ मे रोजी दोन मजुराच्या मदतीने घरासमोर खड्डा खोदला. सकाळी ९.३० नंतर मजूर चहापाणी घेण्यासाठी बाहेर गेले असता, या महिलेने महादेवचे प्रेत त्या खड्ड्यात पुरले व माती ओढून घेतली. मंजुळाबाईच्या हालचाली सकाळपासूनच संशयास्पद वाटत असल्याचे शेजारी राहणार्‍या एका इसमाच्या लक्षात आले. मंजुळाबाईने अचानक खड्डा का खोदला? यावर गावात चर्चा सुरू झाली. यानंतर या खड्ड्यात कोणाचे तरी प्रेत असल्याचे समोर आले. या घटनेची माहिती पिंजर पोलिसांना मिळताच ठाणेदार एम.एम. ठाकरे व ताफा घटनास्थळी दाखल झाला. पोलिसांनी मंजुळाबाईला ताब्यात घेतले असता, तिने घटना सत्य असल्याचे सांगितले. मात्र, महादेवने आत्महत्या केली; मी त्याला जमिनीत पुरले, अशी माहिती मंजुळाबाईने दिल्याचे पोलिसांनी सांगितले. रात्री उशिरापर्यंत गुन्हा दाखल करण्याची प्रक्रिया सुरू होती. अनैतिक संबंधातून वाद निर्माण झाल्याने मंजुळाबाईनेच हा खून केल्याचा दावा पोलिस करीत आहेत. सध्या महादेव निलखन याचे प्रेत जमिनीत असून, तहसीलदारांच्या उपस्थितीत २३ मे रोजी जागेचे उत्खनन होणार आहे.