ठळक मुद्देवाडेगाव येथील सुनील श्यामराव मानकर हे कामानिमित्त अकोला गेले होते. मांजा सुनील मानकर यांच्या गळ्यात अडकला आणि त्यांचा मांजाने गळा कापला गेला.
वाडेगाव: येथील दुचाकीस्वार अकोलावरून वाडेगावकडे येत असताना पतंगाच्या मांज्यामुळे अचानक गळा कापल्यामुळे दुचाकीस्वार जखमी झाल्याची घटना बुधवारी सायंकाळी घडली. जखमीवर रुग्णालयात उपचार सुरू आहेत.
वाडेगाव येथील सुनील श्यामराव मानकर हे कामानिमित्त अकोला गेले होते. घरी परत येत असताना, अकोला बायपास परिसरात पतंगाचा चायना मांजा सुनील मानकर यांच्या गळ्यात अडकला आणि त्यांचा मांजाने गळा कापला गेला. यात ते जखमी झाले. हा पतंग मांजा मानेला अडकताच, त्यांनी दुचाकी गाडी झुकवून दुपट्ट्याने मांजा खाली ओढला. त्यामुळे त्यांचा जीव वाचला. या चायना मांज्यामुळे अनेक ठिकाणी अपघात होऊन नागरिकांना आपले प्राण गमवावे लागले आहेत. एकीकडे चायना मांज्यावर बंदी असतानासुद्धा पतंग उडविण्यासाठी चायना मांज्याचा वापर होत आहे.