अकोला - वीज जोडणी देण्यासाठी ७00 रुपयांची लाच मागितल्याप्रकरणी महावितरण कंपनीचे कनिष्ठ अभियंता नवलकिशोर टावरी यांना गुरुवारी अटक करण्यात आली. २0१२ मध्ये सदर प्रकरणी एका खासगी लाईनमनला अटक करण्यात आली होती. या प्रकरणात अभियंत्याचाही हात असल्याचे समोर आल्यानंतर त्यांना अटक करण्यात आली. जुने शहरातील रहिवासी एका वीज ग्राहकाने नवीन वीज कनेक्शन घेण्यासाठी वीज तक्रार निवारण केंद्रात अर्ज सादर केला होता. वीज कनेक्शन देण्यासाठी या केंद्रातील कनिष्ठ अभियंता नवलकिशोर टावरी यांनी खासगी लाईनमन श्रीकृष्ण जानकीराव पांडव यांच्यामार्फत वीज ग्राहकाला ७00 रुपयांची लाच मागितली होती. या प्रकरणी वीज ग्राहकाने लाचलुचपत प्रतिबंधक विभागाकडे तक्रार केली होती. त्यानंतर श्रीकृष्ण पांडव यांना ७00 रुपयांची लाच घेताना २७ जून २0१२ रोजी अटक करण्यात आली होती. लाचलुचपत प्रतिबंधक विभागाने या प्रकरणाची सखोल चौकशी केल्यानंतर लाच मागण्यासाठी वापरण्यात आलेले सीमकार्ड आणि मोबाईल हा कनिष्ठ अभियंता टावरी यांचा असल्याचे समोर आले असून, या प्रकरणात टावरी दोषी असल्याचे सिद्ध झाले. त्यानंतर लाचलुचपत प्रतिबंधक विभागाने नवलकिशोर टावरी यांना गुरुवारी अटक केली. त्यांना शुक्रवारी न्यायालयात हजर करण्यात येईल.
महावितरणचा कनिष्ठ अभियंता गजाआड
By admin | Updated: June 20, 2014 00:45 IST