डिजीटल माेहिमेंतर्गत साक्षरता प्रशिक्षण

मूर्तिजापूर : नगरपरिषद, जिल्हा अकोला दीनदयाळ अंत्योदय योजना, राष्ट्रीय नागरी उपजीविका अभियान यांच्या निर्देशानुसार पंतप्रधान पथविक्रेता आत्मनिर्भर निधी अंतर्गत ‘मैं भी डिजिटल’ मोहीम अंतर्गत आर्थिक साक्षरता प्रशिक्षण १२ जानेवारीला मुख्याधिकारी विजय लोहकरे यांच्या मार्गदर्शनात पार पडले. शहरातील पथविक्रेत्यांना या योजनेअंतर्गत दहा हजार रुपये प्रति लाभार्थीप्रमाणे कर्ज राष्ट्रीयकृत बँकेमार्फत उपलब्ध करून देण्यात आले. आपला व्यवसाय करत असताना आर्थिक व्यवहार करण्याकरिता डिजिटल साधनांपासून मिळणारे फायदे, डिजिटल साधने कशी वापरावीत, याचे प्रशिक्षण लाभार्थ्यांना देण्यात आले. यावेळी नगराध्यक्षा मोनाली गावंडे, सेंट्रल बँक ऑफ इंडिया मूर्तिजापूरचे अधिकारी निशिकांत चव्हाण, सहा प्रकल्प अधिकारी राजेश भुगुल यांच्या हस्ते क्यूआर कोडचे वाटप करण्यात आले. यावेळी सेंट्रल बँकेकडून ४५ लाभार्थ्यांना डिजिटल पेमेंट करण्याबाबत व क्यूआर कोड वापरण्याचे प्रशिक्षण देण्यात आले. पुढील प्रशिक्षण २४ जानेवारीला कालावधीत विविध बँकेमार्फत आयोजित केल्याची माहिती सहा. प्रकल्प अधिकारी राजेश भुगुल यांनी दिली.