भरधाव ट्रकने बालकास चिरडले!

हिंगोलीवरून वाशिमकडे भरधाव येणा-या ट्रकने चिरडले; गतिरोधक बसविण्याची मागणी.

वाशिम, दि. १: हिंगोलीवरून वाशिमकडे भरधाव येणार्‍या ट्रकने अंजनखेडा फाट्यानजिक बालकास चिरडले. ही घटना १ सप्टेंबर रोजी दुपारी ३.३0 वाजता घडली. अंजनखेडा येथील महादू खंडू वाकुडकर व त्याचा नातू नितीन देवल वाकुडकर (वय ७ वर्षे) हे दोघे कामानिमित्त अंजनखेडा फाट्यावर आले होते. या दरम्यान हिंगोलीकडून भरधाव येणार्‍या ट्रकने (क्रमांक के. ए. २५ बी ८२९६) नितीन वाकुडकरला चिरडले. यात तो जागीच मृत्युमुखी पडला. या प्रकरणी वाशिम ग्रामीण पोलीस ठाण्यात ट्रकचालकाविरुद्ध विविध कलमान्वये गुन्हा नोंदविण्यात आला. दरम्यान, अंजनखेडा फाट्यावर यापूर्वीही अनेक अपघात घडले असून, याठिकाणी गतिरोधक उभारावे, अशी मागणी जोर धरत आहे.