कुरुम: कार नादुरुस्त झाल्यानंतर मदतीसाठी रस्त्याच्या कडेला उभ्या असलेल्या एका खासगी कृषी कंपनीच्या विभागीय व्यवस्थापकास भरधाव कारने चिरडल्याची घटना राष्ट्रीय महामार्ग क्र. ६ वर मधापुरी फाट्यानजीक रविवार, १४ सप्टेंबरच्या रात्री घडली. पोलिस सूत्रांकडून मिळालेल्या माहितीनुसार, क्रिस्टल या खासगी कृषी कंपनीत अकोला विभाग व्यवस्थापक पदावर कार्यरत असलेले अजय केशवराव पवार (४0, रा. अमरावती) हे रविवारी सायंकाळी त्यांचा मित्र नीलेश भाऊराव राऊत व अन्य एका मित्रासोबत अमरावतीहून कुरुम येथील हॉटेल जयकारा येथे कंपनीच्या एम. एच. ३0 ए. एफ. ६९३८ क्रमांकाच्या बोलेरो गाडीने येत असताना त्यांच्या कारचे टायर फुटले. त्यामुळे कार उभी करून महामार्गावरून जात असलेल्या एखाद्या वाहनचालकाकडे मदत मागण्यासाठी अजय पवार हे रस्त्याच्या कडेला उभे होते. त्यावेळी अकोल्याहून अमरावतीकडे जात असलेल्या एम. एच. ३१ डी. सी. ७२९४ क्रमांकाच्या कारने अजय पवार यांना जोरदार धडक दिली. त्यात अजय पवार जागीच ठार झाले. यावेळी कारचालकाने घटनास्थळाहून पलायन केले. पवार यांचे मित्र नीलेश राऊत यांच्या फिर्यादीवरून, माना पोलिसांनी अज्ञात कारचालकाविरुद्ध गुन्हा दाखल केला आहे. ठाणेदार सुनील हुड यांच्या मार्गदर्शनाखाली सहायक पोलिस उपनिरीक्षक कामताप्रसाद मिश्रा, पो.कॉ. सुमेद मोहोड तपास करीत आहेत. (वार्ताहर)
महामार्गावर मदत मागणार्याला कारने चिरडले!
By admin | Updated: September 16, 2014 18:21 IST