अकोला : राज्यभरात काेराेना संसर्ग वाढत असल्याने सरकारने कडक निर्बंध लावले आहेत. यादरम्यान ऑटाेरिक्षाचालकांना आर्थिक संकटाचा सामना करावा लागू नये, यासाठी परवानाधारकांना दीड हजार रुपयांची मदत देण्याचा निर्णय घेण्यात आला. मात्र, अद्यापही ही मदत ऑटोचालकांना मिळाली नसल्याने मदत केव्हा मिळणार, असा सवाल ऑटोचालक करीत आहेत.
जिल्ह्यातील १३ हजार ६२५ ऑटाेरिक्षाचालकांना या निर्णयाचा लाभ हाेणार होता. मात्र, जिल्ह्यातील यापैकी केवळ ५९४० ऑटोचालकांनी परवान्याचे नूतनीकरण केल्यामुळे त्यांनाच हा लाभ मिळणार असल्याची माहिती आहे. इतर ऑटोचालकांना हा लाभ मिळणार नसल्याचे सूत्रांचे म्हणणे आहे. गत वर्षीपासून काेराेना संसर्ग वाढत असल्याने ऑटाेरिक्षाचालक आर्थिक संकटात सापडले आहेत. मार्च महिन्यापासून शासनाने निर्बंध लावणे सुरू केले आहे. त्यातच काेराेना रुग्ण वाढत असल्याने १५ एप्रिलपासून सरकारने संचारबंदी लागू केली आहे. सरकारने ऑटाेचालकांना मदत देण्याची घाेषणा केली असली तरी इतरांचे काय, असा प्रश्न पडला आहे. मात्र, ऑटोचालकांना जाहीर केलेली मदत अद्यापही त्यांच्या खात्यात जमा झाली नसल्याने ही मदत तातडीने देण्याची मागणी ऑटोचालकांकडून करण्यात येत आहे.
---------------------
गतवर्षी मार्च महिन्यापासून काेराेना संसर्ग वाढत असल्याने लाॅकडाऊन करण्यात आले हाेते. त्यामुळे, बँकांचे हप्तेही भरू शकलाे नाही. सरकाने १५०० रुपयांची मदत जाहीर केली आहे. मात्र, ही मदत ताेकडी आहे. ही मदत अद्यापही खात्यात जमा झाली नाही.
- जय राठोड, ऑटाेचालक
------------------------
सरकारने जाहीर केलेल्या मदतीमुळे ऑटाेचालकांना दिलासा मिळाला. मात्र, रक्कम खात्यात जमा झाली नाही. नाेंदणीकृत ऑटाेचालकांनाच ही मदत मिळणार असल्याने खासगीमध्ये ऑटाे चालवणाऱ्यांना ही मदत मिळणार नाही. त्यामुळे सरसकट ऑटाेचालकांना सरकारने मदत द्यावी.
- बाबूराव शेळके, ऑटाेचालक
------------------------------
सततच्या लाॅकडाऊनमुळे ऑटाेचालकांवर उपासमारीची वेळ आली आहे. सरकारने मदत देण्याची घाेषणा केल्याने ऑटाेचालकांना दिलासा मिळणार आहे. अनेक युवक भाड्याने ऑटाे घेऊन आपला उदरनिर्वाह करतात. त्यांना या मदतीपासून वंचित राहावे लागणार आहे. तसेच ही मदत अद्याप प्राप्त झाली नाही.
- राहुल इंगळे, ऑटाेचालक
------------------------------------------
जिल्ह्यातील परवानाधारक
रिक्षाचालकांची संख्या
१३६२५
वैध असलेले परवानाधारक
५९४०
शासनाकडून आटोचालकांची माहिती मागविण्यात आली आहे. त्यानुसार अकोल्यातील परवानाधारक आटोचालकांची माहिती शासनाला सादर करण्यात आली आहे. त्यांच्या खात्यात मदत देण्याची प्रक्रिया वरिष्ठ स्तरावरून होणार आहे.
-गोपाल वरोकार,
डेप्युटी आरटीओ, अकोला