रस्त्याच्या कामामुळे वाहतुकीचा खोळंबा
अकोला : मूर्तिजापूर रोडवरील डाॅ. पंजाबराव देशमुख कृषी विद्यापीठाच्या परिसरात महामार्गाच्या रुंदीकरणाचे काम सुरू आहे. त्यामुळे वाहतुकीचा खोळंबा होताना दिसत आहे. दरम्यान, अवजड वाहनांच्या वेगावर कुठलेही नियंत्रण राहत नसल्याने या भागात अपघाताची शक्यता नाकारता येत नाही. त्यामुळे वाहतुकीच्या नियमनाकडे प्रशासनाने लक्ष द्यावे, अशी मागणी वाहनचालकांकडून करण्यात येत आहे.
शहरात पेटतात कचर्याच्या शेकोट्या
अकोला : शहरातील विविध रहिवाशी भागात असलेल्या मोकळ्या भूखंडांवर कचरा जाळण्याचे प्रकार सुरू आहेत. परिणामी मोठ्या प्रमाणात धूर होत असून, दुर्घटनेची शक्यताही नाकारता येत नाही. त्यामुळे कचरा जाळणार्यांवर वचक बसवावा, अशी मागणी कौलखेड परिसरातील रहिवाशांकडून होत आहे.
फलक फक्त नावापुरते
अकोला : जिल्हाधिकारी कार्यालय व जिल्हा परिषदेसह विविध शासकीय कार्यालयात नो मास्क, नो एंट्रीचे फलक लावण्यात आले आहेत. मात्र खुद्द कर्मचारीच नियमांचे पालन करत नसल्याने या सूचना फक्त सामान्य नागरिकांसाठीच का, असा प्रश्न उपस्थित केला जात आहे.