अनधिकृत बांधकामावर चालला गजराज!

अकोला मनपाची आजवरची सर्वात मोठी कारवाई: मंजुरीपेक्षा होते तीनपट अधिक बांधकाम.

अकोला: महानगर पालिकेने मंजूर केलेल्या क्षेत्रफळापेक्षा इमारतीचे तब्बल तीनपट अनधिकृत बांधकाम उभारणार्‍या वाडेगावचे माजी सरपंच आसीफ खान मुस्तफा खान व शहरातील प्रख्यात अस्थीरोग तज्ज्ञ डॉ.रहेमान खान यांच्या इमारतीचा अनधिकृत भाग महापालिका प्रशासनाने शुक्रवारी जमीनदोस्त केला. वाशिम बायपास चौकात मनपाच्या इतिहासातील ही सर्वात मोठी कारवाई मानल्या जात आहे. मनपाचे तत्कालीन आयुक्त डॉ.महेंद्र कल्याणकर यांनी निर्माणाधिन १८६ इमारतीच्या मालमत्ताधारकांना नोटिस बजावून अनधिकृत बांधकाम बंद करण्याचे सुचित केले होते. कल्याणकर यांची बदली होताच व्यावसायिकांनी इमारतींचे बांधकाम सुरू केले. मनपा आयुक्त अजय लहाने यांनी अशा निर्माणाधिन बांधकामांवर कारवाईचे हत्यार उपसल्याने व्यावसायिकांमध्ये नाराजी पसरली. ही बाब ध्यानात घेता आयुक्त लहाने यांनी १८ नोव्हेंबर रोजी संबंधित मालमत्ताधारकांची मनपात बैठक घेऊ न सूचना केल्या होत्या. यादरम्यान, वाडेगावचे माजी सरपंच आसीफ खान व शहरातील अस्थिरोग तज्ज्ञ डॉ.रहेमान खान यांनी वाशिम बायपास चौकात अनधिकृत बांधकाम करून पाच मजली इमारत उभारल्याची तक्रार डॉ.कनीज आयेशा अरब यांनी मनपासह विभागीय आयुक्तांकडे केली होती. मनपाने तक्रारीची शहानिशा केली असता आसीफ खान यांनी मंजूर क्षेत्रफळ ६0३ चौरस मीटरपेक्षा तब्बल तीन पट अधिक २ हजार ४00 चौरस मीटर बांधकाम केल्याचे समोर आले. यामध्ये चारही बाजूने एकूण १५ फूट अधिक अतिरिक्त बांधकाम करण्यात आले. तर पाचवा मजला संपूर्णपणे बेकायदेशीर असल्याचे आढळून आले. इमारतीचे अनधिकृत बांधकाम जमीनदोस्त करण्याचे आयुक्त अजय लहाने यांनी आदेश दिले. त्यानुसार नगर रचना विभाग व अतिक्रमण विभागाच्या पथकाने दुपारी १ वाजता कारवाईला सुरुवात केली. सायंकाळपर्यंंत ही कारवाई करण्यात आली.