मूर्तिजापूर : कोरोनाबाधित रुग्णांना पॉझिटिव्ह अहवालानंतर हेंडज येथील शासकीय तंत्रनिकेतन महाविद्यालयात पाच दिवस क्वारंटाइन राहिल्यानंतर त्यांना पुढील दहा दिवस होमक्वारंटाइन राहण्यास सांगितले जाते, परंतु असे रुग्ण शहरात व ग्रामीण भागात बिनधास्त फिरताना आढळून आले आहे. अशा रुग्णांमुळे अधिक प्रसार होण्याची शक्यता नाकारता येत नाही.
मूर्तिजापूर शहरात नागरी व व्यापाऱ्यांसाठी सतत कोरोना चाचणी शिबिर आयोजित करण्यात येत आहे. तसे नागरिकांना आवाहनही करण्यात आले आहे. त्या आवाहनाला नागरिकांकडून प्रचंड प्रतिसाद पण मिळत आहे. अशावेळी अनेक जणांचा अहवाल पॉझिटिव्ह आला आहे. दरम्यान, अशा बाधितांना नंतर हेंडज येथील शासकीय तंत्रनिकेतन महाविद्यालयात पाच दिवसांसाठी क्वारंटाइन करून त्यांच्यावर उपचारदेखील करण्यात येतात, उपचारानंतर रुग्णांना सक्तीने होमक्वारंटाइन राहण्यास सांगितले जाते. परंतु आपण ठणठणीत असल्याच्या अविर्भावात होमक्वारंटाइनच्या सक्तीला न जुमानता शहरात व ग्रामीण भागात मुक्तसंचार करताना आढळून येत असल्याने हा चिंतेचा विषय ठरला आहे. अशा रुग्णांमुळे तालुक्यात कोरोनाचा अधिक फैलाव होत असल्याचे बोलल्या जात आहे. या संदर्भात प्रशासनाने सक्ती कडक करण्याची मागणी होत आहे. सर्वत्र जमाव बंदी लागू करण्यात आली असता नागरिकांचे घोळके व दुकानात गर्दी होत असल्याचे चित्र आहे तर ग्रामीण भागात टवाळ गोष्टी करण्यासाठी एकत्र जमताना दिसतात अशा परिस्थितीला आळा घालून कोरोना नियंत्रणात आणता येत असताना प्रशासनाने या गोष्टीला गांभीर्याने घेण्याची गरज आहे.
होमक्वारंटाइन असलेल्या रुग्णांच्या घरोघरी जाऊन चेकिंग करण्यासाठी सात टिम तयार केल्या आहेत. होमक्वारंटाइन असलेले रुग्ण बाहेर फिरताना आढळल्यास नागरिकांनी ही आमच्या निदर्शनास आणून द्यावी. दोषी व्यक्तीवर निश्चितच गुन्हा दाखल करण्यात येईल.
अभयसिंह मोहिते
उपविभागीय अधिकारी, मूर्तिजापूर