अकोला: शहरातील संभाव्य पाणीटंचाईवर उपाययोजना करताना विहिरीतून गाळ काढण्याच्या कामांचा समावेश होता. प्रभाग क्रमांक १२ मध्ये जलप्रदाय विभागाचे कनिष्ठ अभियंता नीरज ठाकूर यांनी तीन विहिरीतील गाळ काढण्याच्या मोबदल्यात अदा केल्या जाणाऱ्या देयकाच्या फाइलमध्ये घोळ केल्याची बाब खुद्द महापालिका आयुक्त संजय कापडणीस यांच्या निदर्शनास आली आहे. याप्रकरणी नीरज ठाकूर यांच्याविरोधात फौजदारी तक्रार दाखल करण्याचा आदेश शुक्रवारी आयुक्त कापडणीस यांनी जारी केल्याने खादाड कर्मचाºयांच्या पायाखालची वाळू सरकली आहे.मार्च २०१८ मध्ये महान धरणात अत्यल्प जलसाठा उपलब्ध असल्याचे पाहून शहरातील संभाव्य पाणीटंचाईवर मात करण्यासाठी सत्ताधारी भाजपाने व प्रशासनाने समन्वय साधत १४ कोटींचा प्रस्ताव तयार केला होता. शासनाने या प्रस्तावाला कात्री लावत महत्त्वाच्या कामांचा समावेश करण्याचे निर्देश देत ३ कोटी २८ लाख रुपये निधी मंजूर केला होता. यामध्ये नवीन सबमर्सिबल पंप, हातपंप कार्यान्वित करणे, विहिरीतील गाळ काढून खोलीकरण करणे, नादुरुस्त सबमर्सिबल पंप दुरुस्तीचा समावेश होता. जलप्रदाय विभागामार्फत कंत्राटदारांनी सदर कामे केल्यानंतर या विभागातील कनिष्ठ अभियंत्यांनी प्रत्यक्ष कामाची पाहणी करून देयकांच्या फायली तयार केल्या. या कामांचे देयक प्राप्त व्हावे, या उद्देशातून सदर फायली मनपा आयुक्त संजय कापडणीस यांच्याकडे स्वाक्षरीसाठी सादर करण्यात आल्या. आयुक्त कापडणीस यांनी प्रभाग क्रमांक १२ मधील तीन विहिरींचा गाळ काढून खोलीकरण करण्याच्या फ ायली तपासल्या असता, संबंधित कनिष्ठ अभियंता नीरज ठाकूर यांनी मोजमापात घोळ केल्याचे त्यांच्या निदर्शनास आले. प्रकरणाचे गांभीर्य लक्षात घेता अभियंता नीरज ठाकूर यांच्याविरोधात फौजदारी तक्रार दाखल करण्याचा आदेश जलप्रदाय विभागाचे कार्यकारी अभियंता सुरेश हुंगे यांना शुक्रवारी देण्यात आला.संगनमत केल्याचा संशयप्रभाग क्रमांक १२ मध्ये तीन विहिरींचा गाळ काढणे व खोलीकरणाचा समावेश होता. त्यासाठी प्रत्येकी एक लाख रुपये मंजूर करण्यात आले होते. याप्रकरणी मनपा कर्मचाºयांना हाताशी धरून काही नगरसेवकांनी संगनमत केल्याचा दाट संशय प्रशासनाने व्यक्त केला आहे.
मानधन तत्त्वावर कार्यरत कनिष्ठ अभियंता नीरज ठाकूर यांच्याविरोधात फौजदारी तक्रार दाखल करण्याचे निर्देश आयुक्तांनी दिले आहेत. त्यानुसार कारवाई केली जाईल.-सुरेश हुंगे,कार्यकारी अभियंता जलप्रदाय विभाग, मनपा.