अकोट : शरद जोशींनी शेतकऱ्यांच्या पायातील बेड्या तोडून शेतकऱ्यांना संपूर्ण स्वातंत्र्य मिळवून देण्याचे स्वप्न पूर्ण करण्यासाठी शेतकरी संघटना कटिबद्ध असल्याचे मत शेतकरी संघटनेचे अध्यक्ष ललीत बहाळे यांनी केले. ते शेतकरी संघटनेच्या तीन दिवसीय संयुक्त कार्यकारिणीच्या बैठकीच्या समारोपीय कार्यक्रमात बोलत होते.
शेतकरी संघटनेची तीन दिवसीय संयुक्त कार्यकारिणी दि.३ सप्टेंबरपासून आयोजित केली होती. या बैठकीत राज्यभरातून शेतकरी संघटनेचे पदाधिकारी सहभागी झाले होते. या बैठकीत राज्यातील शेतकऱ्यांच्या विविध प्रश्नांवर सखोल चर्चा करण्यात आली. तीन दिवसीय संयुक्त कार्यकारिणीचा समारोप दि. ५ रोजी करण्यात आला. यावेळी शेतकरी संघटनेच्या कार्यकारी मंडळाची निवड करण्यात आली. यामध्ये शेतकरी संघटनेच्या अध्यक्षपदी ललीत बहाळे यांची नियुक्ती करण्यात आली. महिला आघाडीच्या अध्यक्षपदी प्रज्ञा बापट, तर शेतकरी संघटना युवा आघाडीच्या अध्यक्षपदी सुधीर बिंदू यांची निवड करण्यात आली. यावेळी स्वतंत्र भारत पक्षाच्या राष्ट्रीय अध्यक्षपदी अनिल घनवट यांची, तर महाराष्ट्र प्रदेश अध्यक्षपदी मधुसूदन हरणे यांची, तर अकोला जिल्हा शेतकरी संघटना अध्यक्षपदी लक्ष्मीकांत कौठकर यांची निवड करण्यात आली. याप्रसंगी माजी आमदार वामनराव चटप, मा.आ. सरोज काशीकर, ॲड.दिनेश शर्मा, अनिल घनवट यांनी कार्यकारिणीस मार्गदर्शन केले.
-----------------------
‘लक्ष्मीमुक्तीचे आंदोलन पुन्हा सुरू करणार!’
यावेळी अध्यक्ष ललीत बहाळे यांनी महिलांना मालमत्तेत सहभागी करून घेण्यासाठी लक्ष्मीमुक्तीचे आंदोलन पुन्हा सुरू करणार असल्याचे सांगितले. या बैठकीस माजी अध्यक्ष गुणवंत पाटील हंगरगेकर, मधुसूदन हरणे, अनंतराव देशपांडे, संजय कोले, सतीश दाणी, सीमा नरोडे, शैलजा देशपांडे, ज्योत्स्ना बहाळे, मदन कामाडे, वामनराव जाधव, शशीकांत भदाणे, रामजीवन बोंदर, अनिल चव्हाण, डॉ.आप्पासाहेब कदम, समाधान कणखर, सुरेश जोगळे, सतीश देशमुख, अविनाश नाकट, धनंजय मिश्रा, विलास तातोड, डॉ.नीलेश पाटील यांच्यासह राज्यभरातील शेतकरी संघटनेचे पदाधिकारी मोठ्या संख्येने उपस्थित होते. या बैठकीचे संचालन सतीश देशमुख यांनी केले, शेतकरी संघटनेची शपथ घेऊन कार्यकारिणीचा समारोप करण्यात आला.