मनपा निवडणुकीच्या मुद्यावर निवडणूक आयुक्तांची बैठक

अमरावतीमध्ये आज घेणार आढावा.

अकोला: राज्यातील दहा महापालिकेच्या निवडणुकीचा कालावधी जवळ आला असून, फेब्रुवारी २0१७ मध्ये पार पडणार्‍या निवडणुकीचा उद्या अमरावतीत राज्य निवडणूक आयोगाकडून आढावा घेतल्या जाणार आहे. या बैठकीला राज्य निवडणूक आयुक्त जे.एस. सहारिया उपस्थित राहण्याची शक्यता असून, बैठकीसाठी सोमवारी मनपा आयुक्त अजय लहाने अमरावतीकडे रवाना झाले. राज्यातील दहा महापालिकांमध्ये फेब्रुवारी २0१७ मध्ये सार्वत्रिक निवडणुकीचा कार्यक्रम पार पडेल. यामध्ये अकोला मनपाचा समावेश आहे. निवडणूक कार्यक्रमाचा आढावा घेण्यासाठी १६ फेब्रुवारी रोजी अमरावती येथे विभागीय आयुक्त कार्यालयात राज्य निवडणूक आयोगाची बैठक पार पडेल. या बैठकीला मनपा आयुक्त अजय लहाने उपस्थित राहणार आहेत. दहा महापालिकांसोबतच १९५ नगर परिषद-नगर पंचायत, २६ जिल्हा परिषद तसेच २९७ पंचायत समित्यांची निवडणूक पार पडेल. बैठकीसाठी राज्य निवडणूक आयुक्त जे.एस. सहारिया उपस्थित राहण्याची शक्यता आहे.