भरधाव एसटीच्या धडकेत इसम ठार

एसटी बसची वृद्धास धडक ; चालक ताब्यात.

वाशिम : जुमड्याहून वाशिमकडे भरधाव वेगात येणार्‍या एसटी बसने एका ७0 वर्षीय वृद्धास धडक दिली. या धडकेत वृद्धाचा घटनास्थळीच मृत्यू झाल्याची घटना १८ ऑक्टोबर रोजी दुपारी १२ वाजताचे सुमारास घडली. वाशिम तालुक्यातील जांभरून भित्ते येथील कुंडलिक रघुजी लगड (७0) वाशिम येथे येण्यासाठी बस थांब्याकडे पायदळी चालले होते. रस्ता ओलांडत असताना भरधाव वेगात येणार्‍या एसटीने लगड या वृद्धास जोरदार धडक दिली. या धडकेत वृद्धाचा मृत्यू झाल्याचे लक्षात येताच एसटीचालक घटनास्थळी न थांबता वाशिम आगारामध्ये एसटी घेऊन गेला. एसटी चालकाने वृद्धाला धडक दिल्याचे घटनास् थळावरील नागरिकांनी बघितल्यामुळे पोलिसांनी चालकाचा शोध घेऊन एसटी व चालकाला ताब्यात घेतले. या घटनेमुळे संतप्त झालेल्या नागरिकांनी एसटी चालकाला अटक करेपर्यंत रस्ता रोको केला होता. पोलिसांनी चालकाला ताब्यात घेतल्यानंतर नागरिकांचा रोष कमी झाला. वाशिम ग्रामीण पोलीस ठाण्यात या घटनेची फिर्याद पुंजाजी लगड यांनी नोंदविली. पोलिसांनी एसटी चालकाविरुद्ध भादंविचे कलम २७९, ३0४ (अ) अन्वये गुन्हा दाखल केला.