अकोट : कोरोना साथरोगाने अकोट तालुक्याला विळखा घातला आहे. गत सहा दिवसानंतर लस उपलब्ध झाल्याने नागरिकांनी लसीकरण केंद्रावर ६ मे रोजी मोठी गर्दी केली होती. दरम्यान, कोवॅक्सिन उपलब्ध झाल्यानंतरही तिचा दुसरा डोस मिळत नसल्याने अनेक जणांना ताटकळत प्रतीक्षा करावी लागत आहे. लसीकरण केंद्रावरील ही गर्दी पाहता कोरोनाचे संक्रमण वाढण्याची शक्यता आहे.
कोरोनाच्या दुसऱ्या लाटेत तालुक्यात २० जणांचा मृत्यू झाला. ४०० रुग्ण उपचार घेत आहेत. त्यामुळे लस घेण्याकरिता नागरिकांनी लगबग सुरू केली आहे. दरम्यान, लसीकरणाची वेबसाईट अनेकदा बंद येत असल्याने नागरिकांची नोंदणी होत नाही. तर रात्री एकदम या वेबसाईटवर नोंदणीचा कोटा पूर्ण झाल्याची माहिती अपडेट होत आहे.
फोटो: मेल फोटोत
अनेकांची दुसरा डोस घेण्याची मुदत संपली
ज्या नागरिकांनी कोवॅक्सिनचा पहिला डोस घेतला होता. त्यातील अनेकांची दुसरा डोस घेण्याची मुदत संपली आहे. परंतु त्यांना कोवॅक्सिन उपलब्ध झाल्यावरही दुसरा डोस मिळत नसून कोवॅक्सिनचा १८ ते ४५ वयोटातील नागरिकांना पहिला डोस मात्र देण्यात येत आहे. प्रशासन हा संभ्रम दूर करण्यात अपयशी ठरत असल्याने नागरिकांचा संयम सुटत आहे. आधी कोवॅक्सिन घेतलेल्या लोकांना दुसरा डोस मिळत नाही, मात्र कोवॅक्सिननंतर आलेल्या कोविशिल्ड लसीचा दुसरा डोस मात्र ७० टक्के उपलब्ध करण्यात आला होता. तर पहिल्या डोससाठी मात्र ३० टक्के लस उपलब्ध करण्यात आली होती. त्यामुळे लस घेण्याकरिता लसीकरण केंद्रावर नागरिकांनी मोठी गर्दी केली होती.
आरोग्य यंत्रणेची दमछाक
लसीकरण केंद्रांवर गर्दी होत असल्याने अपुऱ्या मनुष्यबळाअभावी आरोग्य यंत्रणेची चांगलीच दमछाक होत आहे. केंद्रांवर शासनाच्या नियमांचे उल्लंघन होत असल्याचे दिसून येत आहे. सुरक्षित अंतर न ठेवता व नोंदणी पडताळणीला उशीर लागत असल्याने गर्दी होत आहे. परंतु दुसरा डोस न मिळालेल्या नागरिकांसुद्धा या ठिकाणी ताटकळत बसावे लागत आहे.