अमरावतीतील अपहृत बालकाचा अकोटमध्ये खून

खुनानंतर पेट्रोल टाकून जाळले : पठार नाल्यात घडला प्रकार

अकोट, दि. १७- : अमरावती येथील बालकाचे अपहरण करून अकोट शहरानजीकच्या पठार नाल्यात खून झाल्याची खळबळजनक घटना १७ फेब्रुवारी रोजी उघडकीस आली. या घटनेतील आरोपी हा मृत मुलाचा सावत्र बाप आहे. त्यानेच मुलाचे अपहरण करून त्याचा खून करून जाळल्याची कबुली पोलिसांकडे दिली आहे. अमरावती येथील रमण मंगेश दांडगे ( वय ८ वर्षे) याचे ९ फेब्रुवारी रोजी अपहरण झाले होते. याप्रकरणी फ्रेजरपुरा पोलीस स्टेशन येथे अपहृत मुलाची आई प्रज्ञा दांडगे यांनी मुलाचे अपहरण झाल्याची फिर्याद दिली होती. याप्रकरणी अज्ञात आरोपीविरुद्ध ३६३ कलमान्वये गुन्हा दाखल करण्यात आला होता. या घटनेत रमणचा सावत्र बाप याच्यावर पोलिसांचा संशय होता व त्याचा सर्वत्र शोध सुरू होता. दरम्यान, १६ फेब्रुवारीला अकोट शहर पोलिसांना गुप्त माहिती मिळाली. त्यावरून पोलिसांनी बम्मनवाला प्लॉट येथून आरोपी मंगेश नागोराव दांडगे रा.प्रथोट, जि.अमरावती याला जेरबंद करून फ्रेजरपुरा पोलिसांच्या ताब्यात दिले होते. या ठिकाणी त्याची कसून तपासणी केली असता, त्याने आपल्या सावत्र मुलाचे अपहरण करत खून केल्याची कबुली दिली. मंगेश दांडगे याने रमणला अकोट शहरानजिकच्या पठार नाल्यात नेऊन त्याचा खून केला, तसेच त्याच्यावर पेट्रोल टाकून जाळले, अशी माहिती त्याने पोलिसांना दिली. फ्रेजरपुरा पोलिसांनी आरोपीला सोबत घेऊन घटनास्थळ गाठले असता, रमणचा मृतदेह छिन्नविछीन्न अवस्थेत आढळून आला. मृतदेहाची उत्तरीय तपासणी केली जाणार आहे. घटनास्थळी फ्रेजरपुरा येथील पोलीस पथक व अकोट शहर पोलिसांनी पाहणी केली. याप्रकरणी अधिक तपास फ्रेजरपुरा अमरावती पोलीस करीत आहेत. सावत्र बापाचे कृत्य अमरावती येथून अपहरण झालेला रमण दांडगे हा आरोपी मंगेश दांडगे याचा सावत्र मुलगा होता. मंगेश दांडगे याचा पहिला विवाह झाला होता; मात्र त्याची पहिली पत्नी लग्नानंतर काही महिन्यातच सोडून गेली होती. अशातच त्याच्या नातेवाइकांमार्फत मंगेशने प्रज्ञा यांच्याशी दुसरा विवाह केला. प्रज्ञा यांना पहिल्या पतीपासून रमण हा मुलगा होता, तर मंगेश व प्रज्ञा यांना तीन वर्षांची मुलगी आहे. अलीकडे मात्र पती-पत्नीमध्ये वादविवाद विकोपाला गेले होते. त्यामुळे प्रज्ञा माहेरी अमरावती येथे रहावयास गेली होती. आरोपीने तेथूनच सावत्र मुलाचे अपहरण करून अमानवीय कृत्य केले.