भारिप-बमसंचे प्रदेश महासचिव दिलीप तायडे कालवश

अकोला जिल्हा परिषदेचे माजी समाजकल्याण सभापती तायडे यांचे मंगळवारी मुंबई येथे निधन झाले.

अकोला - भारिप-बहुजन महासंघाचे प्रदेश महासचिव दिलीप तायडे यांचे मंगळवारी मुंबई येथे हृदयविकाराने निधन झाले. अकोला जिल्हा परिषदेचे माजी समाजकल्याण सभापती तायडे २३ जून रोजी मुंबई येथे खासगी कामाने गेले असता, त्यांची प्रकृती अचानक अत्यवस्थ झाली. त्यांना तातडीने बॉम्बे हॉस्पिटलमध्ये दाखल करण्यात आले होते. उपचारादरम्यान दुपारी ४ वाजताच्या सुमारास त्यांची प्राणज्योत मालवली. बुधवार, २५ जून रोजी सकाळी ११ वाजेपर्यंत त्यांचे पार्थिव अकोल्यातील गीतानगर येथील चिराग अपार्टमेंटमध्ये असलेल्या त्यांच्या निवासस्थानी अंतिम दर्शनासाठी ठेवले जाईल. दुपारी ३ वाजता पातूर तालुक्यातील भंडारज येथे त्यांच्यावर अंतिम संस्कार होतील. दिलीप तायडे यांच्याकडे भारिप-बमसंचे प्रदेश महासचिवपद होते. त्यांच्या कार्यकाळात पक्षाने वाशिम जिल्ह्यात विस्तार केला होता. जिल्हा परिषद आणि लोकसभा निवडणुकीदरम्यान त्यांनी पक्षाची धुरा सांभाळली होती. जिल्ह्यात अँड. प्रकाश आंबेडकर यांच्या नेतृत्त्वात भारिपची चळवळ रुजविण्यात त्यांचा मोलाचा वाटा होता. त्यांच्या कार्यकाळातच भारिप-बमसंने अकोला जिल्हा परिषदेत सत्ता मिळविली होती. ते समाजकल्याण सभापती असताना अनेक योजना मार्गी लागल्या होत्या. त्यानंतर त्यांना पक्षाने प्रदेशस्तरावरील जबाबदारी सोपविली होती. त्यांना हृदयविकाचाराचा झटका आल्याने ते काही काळ सक्रिय राजकारणापासून दूर राहिले होते. पुन्हा सक्रिय झाल्यानंतर त्यांच्याकडे पक्षाने अनेक महत्त्वाच्या जबाबदार्‍या सोपविल्या होता.