पातूर : कोविन आणि आरोग्य सेतू ॲपद्वारे नोंदणी करणाऱ्या पहिल्या पाचशे १८ ते ४५ वयोगटातील नागरिकांचे कोविड लसीकरण बुधवारपासून डॉ. वंदनाताई ढोणे आयुर्वेद महाविद्यालय (कोविड केअर सेंटर) येथे सुरू झाले आहे. युवकांनी या लसीकरणाचा घ्यावा, असे आवाहन वैद्यकीय अधिकारी डॉ. चिराग रेवाळे यांनी केले आहे.
पातूर तालुक्यात नोंदणी करणाऱ्या पहिल्या ५०० युवकांना कोविड लस दिली जाणार आहे. त्यासाठी १८ ते ४५ वयोगटातील नागरिकांनी आरोग्य सेतू आणि कोविन ॲपवर नोंदणी करणे आवश्यक आहे. त्यानंतरच लस दिली जाणार आहे, अशी माहिती तालुका वैद्यकीय अधिकारी डॉ. विजय रामसिंग जाधव यांनी दिली. गेल्या काही दिवसांपासून पातूर तालुक्यातील ४५पेक्षा अधिक वयाचे तथा दुर्धर आजाराने ग्रस्त नागरिकांसाठी दिली जाणारी लस उपलब्ध नव्हती. त्यामुळे पातूर तालुक्यातील १६ लसीकरण केंद्र बंद झाली होती. मात्र, बुधवारपासून पातूर, बाभुळगाव, मळसूर, आलेगाव, सस्ती प्राथमिक आरोग्य केंद्रात प्रथम येणाऱ्या पहिल्या १३० जणांना कोविड लस दिली जाणार आहे.
लसीअभावी ११ लसीकरण केंद्र बंदच
कोरोनाचा वाढता प्रादुर्भाव लक्षात घेता, लसींचा साठा उपलब्ध होण्याची अत्यंत आवश्यकता आहे. पातूर तालुक्यात २१६ रुग्ण सक्रिय आहेत, त्यांना गृह अलगीकरणात ठेवण्यात आले आहे. मात्र, हे सक्रिय रुग्ण सर्वत्र फिरत असल्यामुळे कोरोनाचे संक्रमण वाढत आहे. त्यांना कोविड केअर सेंटरमध्ये ठेवण्याची मागणी नागरिकांनी केली आहे. तसेच लसींचा साठा उपलब्ध नसल्यामुळे तालुक्यातील ११ लसीकरण केंद्र अद्यापही बंद असल्याची माहिती आहे.
परप्रांतातील २०० कुटुंब परतली
गुजरात राज्यात रसवंतीचा व्यवसाय करायला गेलेली शिर्ला येथील दोनशे कुटुंब गावाकडे परतली आहेत. त्यातील अनेकांना कोरोनासदृश्य लक्षणे आढळली आहेत. त्यामुळे कोरोनाला प्रतिबंध करण्यासाठी शिर्ला येथे आरटीपीसीआर व ॲन्टिजेन रॅपिड चाचणी मोहीम राबविण्याची गरज आहे. यातील एकाचा मंगळवारी कोरोनामुळे मृत्यू झाला.