परीक्षेला उपस्थित असल्यावरही दाखविले अनुपस्थित

संत गाडगेबाबा अमरावती विद्यापीठातील प्रकार; विद्यार्थ्यांची तक्रार.

अकोला : येथील एलआरटी विज्ञान महाविद्यालयात एम.कॉम.चे शिक्षण घेत असलेल्या तीन विद्यार्थ्यांना दुसर्‍या सत्राच्या परीक्षेत उपस्थित असल्यावरही गुणपत्रिकेत अनुपस्थित दाखविले आहे. संत गाडगेबाबा अमरावती विद्यापीठाने हा प्रताप केला असून, विद्यार्थ्यांंनी या संबंधी राष्ट्रीय युवाशक्ती संघटनेकडे तक्रार केली असून, संघटनेने आंदोलन छेडण्याचा इशारा दिला आहे. राष्ट्रीय युवाशक्ती संघटनेचे अध्यक्ष विमल जैन यांनी दिलेल्या माहितीनुसार, संत गाडगेबाबा अमरावती विद्यापीठाच्या एम.कॉम.चा निकाल नुकताच जाहीर झाला असून, यामध्ये विद्यार्थ्यांच्या गुणपत्रिकेत एका विषयात अनुपस्थित दाखवून अनुत्तीर्ण केले आहे. हे विद्यार्थी या परीक्षेला उपस्थित असल्याचे प्रमाणपत्रसुद्धा महाविद्यालयाने दिले आहे. विद्यार्थिनी मोक्षा शाह हिने २0१३ मध्ये परीक्षा दिली असता तिला अनुपस्थित दाखविण्यात आले. त्यावेळी सदर विद्यार्थिनीने विद्यापीठात जाऊन संबंधित विभागाच्या अधिकार्‍यांना भेटून या प्रकरणाची चौकशी करण्याची विनंती केली होती. सदर विद्यार्थिनीने २७ एप्रिल २0१५ रोजी एमकॉम द्वितीय सत्रातील ह्यकॉर्पोरेट टॅक्स प्लॅनिंग अँन्ड मॅनेजमेंटह्ण या विषयाचा पेपर श्री शिवाजी महाविद्यालय अकोला या परीक्षा केंद्रावर दिला. मात्र, १२ जुलै रोजी आलेल्या निकालात पुन्हा तिला अनुपस्थित दाखविण्यात आले. मोक्षा शाह या पेपरला उपस्थित असल्याचे प्रमाणपत्र शिवाजी महाविद्यालयाने दिले आहे. तसेच एम.कॉम. द्वितीय (जुना अभ्यासक्रम) ची विद्यार्थिनी ममता गोंडचवर हिने २७ एप्रिल २0१५ रोजी श्री शिवाजी महाविद्यालयात पेपर दिला होता. तिलाही या पेपरला अनुपस्थित असल्याचे गुणपत्रिकेत दाखविण्यात आले आहे. सदर प्रकार अत्यंत गंभीर असून, यातून विद्यापीठाचा भोंगळ कारभार निदर्शनास येत असल्याचा आरोप विमल जैन यांनी केला आहे. तसेच या विद्यार्थ्यांंना त्वरित न्याय मिळाला नाही तर आंदोलन करण्याचा इशाराही दिला आहे.