अकोला : वीजचोरीच्या वाढत्या प्रमाणाला आळा घालण्यासाठी महावितरणने गेल्या ४८ तासांत अकोला परिमंडलातील तीन्ही जिल्ह्यांमध्ये वेगवेगळ्या ठिकाणी धाडसत्र राबवित वीजचोरीचे ३४० प्रकार उघडकीस आणले. परिमंडालातील थकबाकी वसुलीचे आवाहन समोर असताना परिमंडलाअंतर्गत अकोला, बुलढाणा व वाशीम जिल्ह्यात वीजचोरीचा वाढलेला सुळसुळाट महावितरणसाठी मोठे आव्हान ठरत आहे. त्यामुळे महावितरणने वीजचोराविरुद्ध ॲक्शन मोड घेत वेगवेगळ्या ठिकाणी नियोजनबद्ध मारलेल्या धाडीत परिमंडलात गेल्या ४८ तासांत ३४० वीजचोरांवर कारवाई करण्यात आली आहे.
यामध्ये थेट वीजचोरी किंवा मीटरमध्ये फेरफार करून वीजचोरी करणाऱ्यांची संख्या ही ३२६ आहे, तर १४ ग्राहकांनी ज्या कामासाठी विजेची मागणी केली होती त्यासाठी न वापरता इतर कामासाठी वापरत महावितरणची फसवणूक केली आहे. एकून १ लाख ५९ हजार २४१ युनिटच्या ( १६ लक्ष ६५ हजार रुपये) वीजचोरीत ग्राहकांनी दंडासहित रक्कम भरली नाही तर संबंधितावर विद्युत कायदा कलम १३५ अंतर्गत गुन्हा दाखल करण्यात येणार आहे.
थकबाकी वसूल न झाल्याने महावितरण आर्थिक अडचणीतून जात असताना वीजचोरांनी घातलेला धुमाकूळ महावितरणचे कंबरडे मोडणारा आहे. यापुढे महावितरण अकोला परिमंडलाअंतर्गत नियमित मोहिमा राबवित वीजचोरांवर कठोर कारवाईसाठी प्रयत्न करण्याचे निर्देश क्षेत्रीय कार्यालयांना देण्यात आले आहे.