अकोला : यंदाच्या पावसाळ्यात सतत पाऊस आणि पुरामुळे पिकांचे नुकसान झालेल्या जिल्ह्यातील अतिवृष्टीग्रस्त शेतकऱ्यांना मदत वाटप करण्यासाठी दुसऱ्या टप्प्यात शासनामार्फत प्राप्त झालेला २५ कोटी ७८ लाख ७२ हजार रुपयांचा मदतनिधी जिल्हाधिकारी कार्यालयामार्फत शनिवारी जिल्ह्यातील सातही तहसील कार्यालय स्तरावर वितरित करण्यात आला. उपलब्ध मदतनिधी जिल्ह्यातील अतिवृष्टीग्रस्त ३४ हजार शेतकऱ्यांच्या बँक खात्यात जमा करण्यात येणार आहे.
यंदाच्या पावसाळ्यात जून ते सप्टेंबर या चार महिन्यांच्या कालावधीत सतत पाऊस आणि पुरामुळे जिल्ह्यात पिकांचे मोठ्या प्रमाणात नुकसान झाले होते. त्यामध्ये मूग, उडीद, सोयाबीन, कापूस व तूर इत्यादी पिकांच्या नुकसानाचा समावेश आहे. हाताशी आलेल्या पिकांचे नुकसान झाल्याने शेतकरी संकटात सापडले. या पार्श्वभूमीवर पिकांचे नुकसान झालेल्या जिल्ह्यातील अतिवृष्टीग्रस्त ७२ हजार ४७५ शेतकऱ्यांना मदत वाटप करण्यासाठी निधी मागणीचा प्रस्ताव जिल्हाधिकारी कार्यालयामार्फत शासनाकडे सादर करण्यात आला होता. त्यानुषंगाने जिल्ह्यातील अतिवृष्टीग्रस्त शेतकऱ्यांना मदत वाटप करण्यासाठी पहिल्या टप्प्यात शासनामार्फत २५ कोटी ७८ लाख ७४ हजार रुपयांचा निधी प्राप्त झाला होता. उपलब्ध मदतनिधी डिसेंबर अखेरपर्यंत जिल्ह्यातील ३८ हजार ४५४ शेतकऱ्यांच्या बँक खात्यात जमा करण्यात आला. जिल्ह्यातील उर्वरित ३४ हजार २१ शेतकऱ्यांना मदतवाटप करण्यासाठी दुसऱ्या टप्प्यात शासनाकडून २५ कोटी ७८ लाख ७२ हजार रुपयांचा मदतनिधी ८ जानेवारी रोजी जिल्हाधिकारी कार्यालयाला प्राप्त झाला. उपलब्ध मदतीची रक्कम जिल्ह्यातील अतिवृष्टीग्रस्त शेतकऱ्यांच्या बँक खात्यात जमा करण्यासाठी जिल्हाधिकारी कार्यालयामार्फत जिल्ह्यातील सातही तहसील कार्यालयांना वितरित करण्यात आली. त्यानुसार जिल्ह्यातील अतिवृष्टीग्रस्त शेतकऱ्यांच्या बँक खात्यात लवकरच मदतीची रक्कम जमा करण्याची कार्यवाही तहसील कार्यालयांमार्फत सुरू करण्यात येणार आहे.
तालुकानिहाय अशी वितरित
करण्यात आली मदतीची रक्कम!
अतिवृष्टीग्रस्त शेतकऱ्यांना मदतवाटप करण्यासाठी जिल्हाधिकारी कार्यालयामार्फत २५ कोटी ७८ लाख ७४ हजार रुपये मदतीची रक्कम जिल्हाधिकारी कार्यालयामार्फत जिल्ह्यातील सातही तहसील कार्यालयस्तरावर वितरित करण्यात आली. त्यामध्ये अकोला ५ कोटी ६६ लाख ३ हजार रुपये, बार्शिटाकळी १ कोटी ४२ लाख ९५ हजार रुपये, अकोट ५ कोटी १८ लाख २२ हजार रुपये, तेल्हारा ३ कोटी १८ लाख ७ हजार रुपये, बाळापूर ६ कोटी २९ लाख ६९ हजार रुपये, पातूर १ कोटी ६० लाख ३५ हजार रुपये व मूर्तिजापूर तालुक्यातील शेतकऱ्यांसाठी ४ कोटी ८६ लाख ८२ हजार रुपये मदतीची रक्कम वितरित करण्यात आली.