११६६ घरकुलांना १७ कोटी मंजूर

आकोट : पालिकेद्वारे राबविण्यात येणार्‍या रमाई आवास योजनेंतर्गत ११६६ घरकुलांना शासनाकडून हिरवी झेंडी मिळाली असून, यासाठी तब्बल १६ कोटी ८५ लाख ६४ हजार रुपयांचा निधी मंजूर करण्यात आल्याने रमाई आवास लाभार्थींना मोठा दिलासा मिळाला आहे.राज्य शासनाद्वारे राबविण्यात येणार्‍या रमाई आवास योजनेंतर्गत आकोट पालिकेने सन २०११-१२ मध्ये दिलेले उद्दिष्ट पूर्ण केले होते. त्यानंतर शासनाच्या आदेशावरून सन २०१२-१३ साठी नवीन उद्दिष्ट पाठविण्यात आले. त्यामध्ये दारिद्र्यरेषेखालील ५९० आणि दारिद्र्यरेषेवरील ५०६ लाभार्थींचा समावेश होता. परंतु या उद्दिष्टासाठी निधीच नसल्याने हे सारे प्रस्ताव जिल्हाधिकारी कार्यालयात पडून होते. बराच कालावधी होत असल्याने याबाबत लाथार्थींची मोठ्या प्रमाणात ओरड होती; परंतु प्रत्येकवेळी निधी अनुपलब्धतेचे कारण पुढे केले जात होते. अशा स्थितीत माजी राज्यमंत्री सुधाकरराव गणगणे यांनी राज्याचे समाजकल्याण मंत्री शिवाजीराव मोघे यांना हा प्रश्न निकाली काढण्याची गळ घातली. त्यासाठी नामदार मोघे यांनी आकोट पालिकेशी बैठक आयोजित केली. या बैठकीला माजी राज्यमंत्री गणगणे, नगराध्यक्ष रामचंद्र बरेठिया, मुख्याधिकारी समीर लाठी, संजय अढाऊ, लिपिक किशोर एडणे हे उपस्थित होते. सदर बैठकीमध्ये आकोट पालिकेद्वारे राबविलेल्या योजनेचा आढावा घेण्यात आला. त्यानंतर विशेष बाब म्हणून आकोट पालिकेच्या ११६६ प्रस्तावांना मंजुरात देण्यात आली. या घरकुलांसाठी लागणारा १६ कोटी ८५ लाख ६४ हजारांचा निधी येत्या जूनमध्ये पालिकेस देण्यात येणार आहे. या मंजुरातीमुळे रमाई आवास योजनेच्या लाभार्थींना मोठा दिलासा मिळाला आहे. (प्रतिनिधी).......