अकोले : येथील अगस्ती कला, वाणिज्य व दादासाहेब रूपवते विज्ञान महाविद्यालय या नावात नवलेवाडी नावाचा समावेश व्हावा, अशी मागणी नवलेवाडी ग्रामपंचायत, सरपंच व सदस्यांनी केली आहे. अकोले एज्युकेशन सोसायटी प्रशासनाला याबाबत नुकतेच पत्र देण्यात आले आहे.
१९७२ला अकोले कला व वाणिज्य महाविद्यालय निर्मितीच्या वेळी अकोले, नवलेवाडी, धुमाळवाडी एकत्र ग्रामपंचायत होती. कालांतराने नवलेवाडी स्वतंत्र ग्रामपंचायत झाली. नवलेवाडी ग्रामपंचायत हद्दीत हे महाविद्यालय येते. नवलेवाडी ग्रामपंचायतीचा विद्यमान सरपंच हे काॅलेज व्यवस्थापन समितीचे सदस्य असतात.
अकोले महाविद्यालय नवलेवाडी गावाच्या हद्दीत येत असल्याने ‘अगस्ती कला, वाणिज्य व दादासाहेब रूपवते विज्ञान महाविद्यालय नवलेवाडी, अकोले’ असे नामकरण असावे, अशी मागणी करण्यात आली आहे. नवलेवाडी ग्रामपंचायत सदस्य मंडळाने अकोले एज्युकेशन सोसायटीच्या पदाधिकारी यांची भेट घेऊन यासंदर्भात चर्चाही केली आहे, असे नवनिर्वाचित सरपंच प्रा. विकास नवले यांनी सांगितले.
............................
नवलेवाडी ग्रामपंचायतीचे विद्यमान सरपंच हे काॅलेज व्यवस्थापन समितीचे सदस्य असतात. काॅलेज नावातील बदल हा मंत्रालय पातळीवर होत असतो. त्यासाठी ग्रामपंचायतीने पुढाकार घ्यावा. नावात बदल झाल्यावर पुणे विद्यापीठाला कळवावे लागते.
-जे.डी. आंबरे, अध्यक्ष, अकोले एज्युकेशन सोसायटी