अहमदनगर : कार व जेसीबी यांच्यात समोरासमोर झालेल्या अपघातात कारमधील जिल्हा परिषदेचे मुख्य कार्यकारी अधिकारी राजेंद्र क्षीरसागर जखमी झाले, तर निवासी उपजिल्हाधिकारी संदीप निचित किरकोळ जखमी झाले. नगर-कल्याण महामार्गावरील आणेजवळ नांदूर फाटा येथे मंगळवारी (दि. १९) दुपारी सव्वातीन वाजण्याच्या सुमारास हा अपघात झाला.
सीईओ क्षीरसागर व आरडीसी निचित हे नगरवरून एका अंत्यविधीसाठी संगमनेर तालुक्यात निघाले होते. नगर-कल्याण महामार्गाने जात असताना आणेजवळ त्यांच्या इन्होवा कारला (एमएच १२ जेएम ६५५१) नांदूरला जोडणाऱ्या रस्त्याने जेसीबी अचानकपणे आडवा आला व अपघात झाला. त्यात क्षीरसागर यांच्या डोक्याला मार लागला, तर संदीप निचित हे किरकोळ जखमी झाले. अपघाताची माहिती जिल्हा परिषद सदस्य अजय फटांगरे यांना मिळताच त्यांनी तेथील प्रशांत दाते व रामदास देशमुख यांना याबाबत माहिती दिल्यावर त्यांनी घटनास्थळी जात दोघांनाही आळेफाटा येथील खासगी दवाखान्यात दाखल केले. अपघाताचा पंचनामा करण्याचे काम सुरू असल्याचे आळेफाटा पोलीस ठाण्याचे निरीक्षक मधुकर पवार यांनी सांगितले.
------------फोटो - १९सीईओ अपघात
जिल्हा परिषदेचे मुख्य कार्यकारी अधिकारी राजेंद्र क्षीरसागर व निवासी उपजिल्हाधिकारी संदीप निचित यांच्या कारला नगर-कल्याण महामार्गावर आणेजवळ अपघात झाला.