युपीएससीत पारनेरचा झेंडा

पारनेर : दुष्काळी तालुका व राज्याला गुरुजी पुरविणारा तालुका अशी राज्यात ओळख असणाऱ्या पारनेर तालुक्याच्या शिरपेचात प्रशांत सुंबे, गणेश पोटे, योगेश उंडे, संदीप साठे, ऋषीकेश खिलारी या युवकांनी मानाचा तुरा खोवला आहे़ युपीएससी परीक्षेत एकाचवेळी पाच आय.ए.एस .अधिकारी देण्याचा इतिहास त्यांनी घडविला असून राज्यातील पारनेर हा पहिलाच तालुका ठरला आहे.पारनेर तालुक्याची ओळख राज्याला दुष्काळी तालुका म्हणून आहे. त्यानंतर राज्याला सर्वाधिक शिक्षक पुरविणारा तालुका म्हणून गणना केली जाऊ लागली. पण गुरुवारी दुपारी देशातील प्रमुख शासकीय सेवेची परीक्षा असणाऱ्या युपीएससी परीक्षेत प्रशांत सुंबे (पाडळी आळे), योगेश उंडे (कर्जुले हर्या), गणेश पोटे (राळेगणसिध्दी), संदीप साठे (हंगा), ऋषीकेश खिलारी (टाकळी ढोकेश्वर) यांनी गुणवत्ता यादीत स्थान पटकावले. आणि त्यांचे आय.ए.एस. होण्याचे स्वप्न पूर्ण झाले.पारनेरला न्यु इंग्लीश स्कुलमध्ये शिक्षण घेतलेला प्रशांत सुंबे याने इलेक्ट्रीक व टेलीकम्युनिकेशन इंजीनीअरींगचा अभ्यास पूर्ण करतानाच युपीएससीकडे लक्ष दिले. पुण्यात अभ्यास करुन त्याने यश मिळविले. पारनेर एस.टी. आगारात मॅकेनिक असणारे आप्पासाहेब व आई मीरा यांचे मार्गदर्शन लाभल्याचे प्रशांत सांगतो. तर योगेश उंडे हा कर्जुले हर्या येथील हरेश्वर माध्यमिक विद्यालयाचा विद्यार्थी आहे़ प्रवरानगरला इलेक्ट्रीक व टेलीकम्युनिकेशन इंजीनीअरींगचा अभ्यास पूर्ण करुन त्याने हे यश मिळविले. वडील पांडुरंग हे बीएसएनएलमध्ये सेवेत आहेत. आई नंदा यांचे स्वप्न त्याने पूर्ण केले़ स्टेट बँकेतील अधिकारी त्याचे काका रामदास उंडे व मुख्याध्यापक अशोक बोंदाणे यांचे विशेष मार्गदर्शन लाभल्याचे योगेश ने सांगितले. राळेगणसिध्दीचा गणेश पोटे याचे उदाहरण वेगळेच आहे. राळेगणसिध्दीच्या नापासांच्या शाळेत माध्यमिक शिक्षण पूर्ण केले. नंतर एम.बी.बी.एस. केले़ उपजिल्हाधिकारी झाला. सध्या तो अकोला जिल्ह्यात कार्यरत होता. आता त्याचे आय.ए़एस.चे स्वप्न पूर्ण झाले. वडील संपत पोटे व त्याच्या आईचे त्याला मार्गदर्शन लाभले आहे. शिवाय अण्णा हजारेंचा आदर्श समोरच होता. हंगा येथील संदीप प्रदीप साठे यानेही एम.बी.बी.एस. पूर्ण केल्यानंतर हे यश मिळविले. वडील प्रदीप सोलापूर महापालीकेत उपायुक्त आहेत़ आई सुनीता यांचेही मार्गदर्शन लाभले. ऋषीकेश खिलारी हा टाकळी ढोकेश्वरचा. पण सध्या त्याचे वास्तव्य राहुरी तालुक्यात आहे.