श्रीरामपूर प्रांतचा गतिमान कारभार

राज्य सरकारने २००२ पासून सुरू केलेल्या राजीव गांधी प्रशासकीय गतीमानता अभियान व स्पर्धेत श्रीरामपूरच्या प्रांताधिकारी कार्यालयाने नाशिक महसूल विभागात द्वितीय क्रमांक पटकाविला.

 श्रीरामपूर : राज्य सरकारने २००२ पासून सुरू केलेल्या राजीव गांधी प्रशासकीय गतीमानता अभियान व स्पर्धेत श्रीरामपूरच्या प्रांताधिकारी कार्यालयाने नाशिक महसूल विभागात द्वितीय क्रमांक पटकाविला. जिल्हाधिकारी अनिल कवडे यांच्या हस्ते प्रांताधिकारी प्रकाश थविल यांना प्रशस्तीपत्रक व रोख ३० हजार रूपये देऊन गौरविण्यात आले. कार्यालयातील सर्व कर्मचार्‍यांच्या सहकार्यामुळे व सांघिक कामगिरीचा हा गौरव असल्याचे थविल यांनी सांगितले. अभियान कालावधीत १५३ शिबिरांच्या माध्यमातून ५६ हजार ७८८ दाखले देण्यात आले. ४३ शीव रस्त्यांवरील अतिक्रमणे काढून ७३ किलोमीटरचे रस्ते अतिक्रमणमुक्त करून शेतकर्‍यांना शेती कामासाठी खुले करून देण्यात आले. उपविभागातील १५२ गावांमध्ये चावडी वाचन कार्यक्रम घेऊन १२ हजार १३४ हरकती, आक्षेपांची निर्गती करण्यात आली. फेरफार अदालतींच्या माध्यमातून ४ हजार ९४२ फेरफारांची नोंद करण्यात आली. महसूल अदालतीच्या माध्यमातून एका दिवसात ४७ तंट्यांची सोडवणूक झाली. निश्चित करून दिलेल्या उद्दिष्टानुसार सलग दोन वर्षात १०० टक्के महसूल वसुली पूर्ण करण्यात आले. शासन आपल्या दारी कार्यक्रमांतर्गत दिघी हे गाव दत्तक घेऊन या गावात वृक्ष लागवड करण्यात आली. या गावाशी संबंधित दिघी ते गोंधवणी, दिघी ते खंडाळा व दिघी ते निमगावखैरी या अतिक्रमित शीव रस्त्यांची अतिक्रमणे दूर करुन रस्ते खुले करण्यात आले. तसेच गावातील नागरिकांना शिधापत्रिका, उत्पन्नांचे दाखले, रहिवास दाखल्यांचे वाटप करण्यात आले. (प्रतिनिधी) सुहास मापारींनाही श्रेय थविल यांच्यापूर्वी असलेले तत्कालीन प्रांताधिकारी सुहास मापारी यांनी गाव पातळीवरील तलाठी, कर्मचार्‍यांना गाव पातळीवर काम करणे सुलभ होण्यासाठी ‘राजसारथी’ महसूल दैनंदिनी तयार करून उपलब्ध करुन दिली. तसेच सीसीटीव्ही यंत्रणा कार्यान्वित करण्यात आली. कार्यालयातील संगणक साक्षर बनवून त्यांना स्वतंत्र संगणक, इंटरनेट, इंटरकॉम सुविधा पुरविण्यात आल्या. मापारी यांच्या कारकिर्दीत कमी कालावधीत जलदगतीने मोठ्या प्रमाणात कामे होऊन आतापर्यंतचे पहिली वहिले महसूल लोकन्यायालय भरवून एका दिवसात महसूलचे ४७ खटले निकाली काढण्यात आले. त्यामुळे सन २०१३ मधील मापारींच्या कारकिर्दीत झालेल्या कामाची दखल घेऊन नाशिक विभागात हे कार्यालय ‘प्रगती’ अभियानात द्वितीय आल्याने या पुरस्काराचे श्रेय त्यांना जात आहे. विद्यमान थविल यांनी जुन्या कामांना चालना दिली.