- शिवाजी पवारअहमदनगर - श्रीरामपूर तालुक्यातील एकलहरे शिवारात चोरांनी व्यावसायिकाला ओढणीने गळफास देऊन खून केल्याच्या घटनेत शनिवारी धक्कादायक खुलासा झाला. पोलिस तपासात व्यावसायिकाच्या पत्नीनेच पतीचा गळा आवळून खून केल्याचे निष्पन्न झाले. पोलिसांनी आरोपी पत्नीला अटक केली आहे. पतीच्या लैंगिक छळाला कंटाळून तिने हे कृत्य केले.
बुधवारी रात्री दरोडेखोरांनी व्यावसायिक नईम रशीद पठाण याच्या घरी सात लाख रुपयांची रोकड लुटून त्याचा गळा आवरून खून केला होता. याप्रकरणी त्याच्या पत्नीने पोलिस ठाण्यात दिलेल्या फिर्यादीवरून अज्ञात व्यक्तीविरुद्ध खुनाचा व चोरीचा गुन्हा दाखल करण्यात आला होता. मात्र पोलिसांनी तपास हाती घेताच हा बनाव असल्याचे उघड झाले.
मयताची पत्नी बुशरा पठाण हिने पती नईम याला दुधामध्ये झोपेच्या गोळ्या देऊन बेशुद्ध केले. त्यानंतर घरातील ओढणीच्या मदतीने त्याला गळफास दिला. चोरांनी पतीचा खून केल्याचा व चोरीचा बनाव केला. पोलि तपासामध्ये नईम याने बँकेतून कोणतेही पैसे काढलेले नव्हते व घरात चोरीच्या वेळी पैसे नव्हते हे समोर आले..घरात नईम याचे पैशाचे पाकीट आढळून आले. जोराचा पाऊस झालेला असताना घरात माती अथवा चिखल नव्हता. त्यामुळे पोलिसांचा संशय बळावला.
पोलिसी खाक्या दाखवताच बुशरा हिने गुन्ह्याची कबुली दिली. घटनेत बुशरा हिला आणखी कोणी मदत केली असल्याबाबत पोलिस तपास करत आहेत. अतिरिक्त पोलिस अधीक्षक स्वाती भोर, उपअधीक्षक बसवराज शिवपुंजे व पोलिस निरीक्षक हर्षवर्धन गवळी यांनी पत्रकार परिषदेत घटनेबद्दल माहिती दिली.