श्रीरामपूर : तालुक्यातील हरेगाव रस्त्यावर रात्रीच्या वेळी एका तरुणावर वार करून बंदूक दाखवून ५० हजार रुपयांची रोकड लुटण्यात आली. याप्रकरणी तालुका पोलीस ठाण्यात पाच आरोपींविरूद्ध गुन्हा नोंदविण्यात आला असून एकास अटक करण्यात आली आहे.
जखमी तरुण सचिन कृष्णा वायकर (वय ३०, कांदा मार्केट) याने दिलेल्या फिर्यादीवरून अकील शरीफ कुरेशी, सलीम जहागीरदार, असिफ कैची, गुलाब शहा, आशू पठाण (रा.वार्ड दोन, श्रीरामपूर) यांच्याविरूद्ध गुन्हा नोंदवत अकील कुरेशी यांना अटक करण्यात आली आहे.
हरेगाव रस्त्यावर कालव्याच्याजवळ २० मे रोजी रात्री अकरा वाजेच्या दरम्यान वरील आरोपींनी मारहाण करुन अंगावर कार घालण्याचा प्रयत्न केला. बंदूक दाखवून आपल्याकडील ५० हजार रुपये लुटले असे फिर्यादीत म्हटले आहे. जखमी तरुणाला लोणी येथील प्रवरा ग्रामीण रुग्णालयात उपचाराकरिता भरती करण्यात आले आहे. सहायक पोलीस निरीक्षक नितीन शिंदे हे अधिक तपास करीत आहेत.