अहमदनगर : दिवसेंदिवस सोशल मीडिया वापरणाऱ्यांची संख्या झपाट्याने वाढत आहे. फेसबुक, इंस्टाग्राम, ट्विटर, व्हाॅट्सॲप या प्लॅटफॉर्मच्या माध्यमातून बहुतांशीवेळा शांतता बिघडविणारी किंवा जातीय तेढ निर्माण करणाऱ्या पोस्ट व्हायरल केल्या जातात. अशा पोस्ट तपासून न पाहताच त्या लाईक, शेअर किंवा फॉरवर्ड केल्यास जेलची हवा खावी लागू शकते. काही विघ्नसंतोषी मुद्दामहून चुकीच्या पोस्ट टाकतात तर काहींकडून माहिती तंत्रज्ञान कायद्याबाबत असलेल्या अज्ञानातूनही गुन्हा घडतो.
काहीच कारण नसताना एखाद्या व्यक्तीची अथवा समूहाची भावना दुखविणारी पोस्ट टाकणे, महिलांबाबत अश्लील व्हिडिओ, मेसेज व्हायरल करणे, बदनामी करण्यासाठी बनावट प्राेफाईल बनविणे, फोटोंचे मॉर्फिंग करणे आदी प्रकार सोशल नेटवर्किंग साईटच्या माध्यमातून वारंवार होतात. अशा पोस्ट व्हायरल करणाऱ्यांवर पोलिसांकडून कारवाई होतेच; मात्र या पोस्टला लाईक, शेअर आणि फॉरवर्ड करणारेही अनेकवेळा कायद्याच्या कचाट्यात अडकले आहेत. फेसबुकच्या माध्यमातून बनावट प्राेफाईल तयार करणे, अश्लील कमेंट टाकणे, बदनामी करणे अशा स्वरुपाच्या तक्रारींचे सायबर पोलीस ठाण्यात प्रमाण वाढले आहे.
-------------------------
साेशल मीडियाचा वापर करा सांभाळून
बहुतांशी जण सोशल मीडियावर सक्रिय असतात. पण त्यांना याबाबत असलेले कायदे अथवा आधुनिक तंत्रज्ञाची माहिती नसते. अशावेळी त्यांची ऑनलाईन आर्थिक फसवणूक होते किंवा त्यांच्याकडून अनवधानाने गुन्हा घडतो. हे टाळण्यासाठी सोशल मीडियाचा वापर करताना नागरिकांनी सावधानता बाळगणे गरजेचे आहे.
.....................
मुलींनो, डीपी सांभाळा
साेशल मीडियावर महिलांबाबत सर्वाधिक जास्त गुन्हे घडत आहेत. त्यामुळे महिलांनी हे माध्यम वापरताना दक्षता घ्यावी. महिलांनी फेसबुक, इंस्टाग्राम अथवा इतर माध्यमांवर स्वत:चे अथवा नातेवाईकांचे फोटो शेअर करणे टाळावे, अनोळखी व्यक्तींच्या फ्रेंड रिक्वेस्ट स्वीकारू नये, तसेच प्राेफाईल लॉक करून ठेवावी. व्हॉट्सॲपवर डीपी ठेवताना ‘ओन्ली माय कॉन्टॅक्ट’ या सेटिंगचा वापर करावा. जेणेकरून कुणीही आपला प्राेफाईल फोटो किंवा व्हॉट्सॲप डीपी कॉपी करणार नाही.
-------------------------
आततायीपणा ठरतो घातक
सोशल मीडियावर व्यक्त होताना भावनांना आवर घालावी. एखाद्या विषयावर मत व्यक्त करताना बहुतांशी जण पातळी सोडून व्यक्त होतात. हीच पोस्ट कुणाची तरी भावना दुखावणारी ठरते. अशावेळी पोलिसांकडून कारवाई होते.
-----------------------
कायदा आणि सुव्यवस्थेला बाधा निर्माण करणाऱ्या पोस्ट सोशल मीडियावर व्हायरल करणे अथवा अशा पोस्टला लाईक, शेअर, किंवा त्या फॉरवर्ड करणे हा गुन्हाच आहे. त्यामुळे सामाजिक शांतता बिघडविणाऱ्या पोस्ट सोशल मीडियावर कुणीही व्हायरल करू नयेत, अन्यथा कायदेशीर कारवाई केली जाईल.
- नंदकुमार दुधाळ, पोलीस निरीक्षक, सायबर पोलीस स्टेशन